სიახლეები

ქალების ნამუშევრების გამოფენა ბათუმში და ახალი ცენტრის პრეზენტაცია

28.01.2024 • 5430
ქალების ნამუშევრების გამოფენა ბათუმში და ახალი ცენტრის პრეზენტაცია

„ჩანთებს ვაკეთებ ბისერებისგან. დიდი ხანი არ არის, რაც ამას ვაკეთებ. ვიცი, თუ მეტს მოვინდომებ, მეტსაც გავაკეთებ, მაგრამ მე და ჩემნაირ ადამიანებს ხელშეწყობა გვჭირდება, რომ ჩვენი ნამუშევრები ბევრმა ნახოს და პროდუქციის რეალიზება შევძლოთ“ – ამბობს ელენე ფუტკარაძე.

ეს ელენეს ნამუშევრებია:

ელენეს და აჭარის მუნიციპალიტეტში მცხოვრები სხვა ქალების ნამუშევრების გამოფენა-გაყიდვა 26 იანვარს მოეწყო ბათუმში, ჟორდანიას ქუჩაზე მდებარე კაფე „სოციუმში“.

გამოფენა-გაყიდვა პრეზენტაციის თანხლებით გაიმართა. პრეზენტაციაზე „მშვიდობის, დემოკრატიის და განვითარების კავკასიურმა ინსტიტუტმა“ და, ასევე, „მხარდაჭერისა და შესაძლებლობების განვითარების ცენტრმა“ დამსწრე საზოგადოებას პროექტები წარუდგინეს.

პრეზენტაციის მხარდამჭერი „ტერა ბანკი“ იყო. 

პრეზენტაციისას ისაუბრეს „შშმ პირებისა და ქალების გაძლიერების პროექტის“ შესახებ, რომელსაც მხარს უჭერს ფონდი „პური მსოფლიოსთვის“.

შეხვედრაზე ასევე გაჟღერდა ახალდაფუძნებული ორგანიზაციის, „მხარდაჭერისა და შესაძლებლობების განვითარების ცენტრის“ მიზნები.

ელენე ფუტკარაძემ, ლელა წულუკიძემ, ია დევაძემ და ინგა ბალაძემ საკუთარი ნამუშევრები, ხელნაკეთი ნივთები, თავად წარუდგინეს შეხვედრის მონაწილეებს.

ნამუშევრების შეძენა ნებისმიერ მომხმარებელს შეუძლია ორი კვირის განმავლობაში კაფე „სოციუმში“.

„შშმ პირებისა და ქალების გაძლიერების პროექტის“ ფარგლებში შეიქმნა „მხარდაჭერისა და შესაძლებლობების განვითარების ცენტრი“, რომლის ხელმძღვანელიც ციალა ქათამიძეა. ცენტრი საბოლოოდ ბენეფიციარებმა უნდა მართონ, პირველ ეტაპზე კი ამ პროცესის დაძვრაში მათ პროექტის კოორდინატორები ეხმარებიან:

„ცენტრის მიზანია დაეხმაროს შშმ პირებსა და ქალებს პროდუქციის რეალიზებაში, შექმნაში, თუნდაც შეასწავლოს მათ ახალი ხელსაქმე, გაუწიოს პოპულარიზაცია მათ საქმიანობას.

ვგეგმავთ, ვმასალებიც შევიძინოთ ბენეფიციარებისთვის. ასევე, საჭიროა ბაზრის შესწავლა და ტრენინგ-სემინარები ცოდნის გასაღრმავებლად. შეიქმნება ვებგვერდი, რომლის საშუალებითაც შშმ პირებისა და ქალების მიერ შექმნილი ხელნაკეთი ნივთები ონლაინ გაიყიდება“ – ამბობს ცენტრის ხელმძღვანელი ციალა ქათამიძე.

„მშვიდობის, დემოკრატიის და განვითარების კავკასიური ინსტიტუტის“ წარმომადგენელი, მერაბ ცინდელიანი ამბობს, რომ ცენტრის ბაზაში უკვე 160 ადამიანია დარეგისტრირებული:

„როცა აჭარაში დავდიოდით სხვა პროექტების ფარგლებში, ვხედავდით, რომ უამრავი ქალი, შშმ პირი შინ ამზადებდა საინტერესო ნივთებს, მაგრამ მხოლოდ ჰობად რჩებოდა ეს საქმიანობა მათთვის. დავინახეთ, რომ აუცილებელი იყო მიგვეცა ამ ადამიანებისთვის შესაძლებლობა ჰობი ექციათ შემოსავლის წყაროდ.

პროექტში ჩართულ ხალხს ჩვენს პარტნიორებად მოვიაზრებთ, რომელთა ნამუშევრებიც მაღალი ხარისხით გამოირჩევა, ჩვენი ჩართულობა კი საჭიროა იმისთვის, რომ ეს უნიკალური ნამუშევრები ფართო საზოგადოებამ ნახოს“ – ამბობს მერაბ ცინდელიანი.

„შშმ პირებისა და ქალების გაძლიერების ცენტრი“ მიზნად ისახავს შშმ პირებისა და ქალების არამხოლოდ ეკონომიკურ გაძლიერებას, არამედ ამ გზით მათ სოციალურ, კულტურულ ინტეგრაციასაც.

2023 წლის მარტში ბათუმში დიდი გამოფენა იგეგმება, სადაც პროექტში ჩართული ყველა მონაწილის ნამუშევარს პირველად წარუდგენენ ქალაქის სტუმრებსა და მცხოვრებლებს.

გადაბეჭდვის წესი


ასევე: