„გადავკეტავთ ქუჩას“ – ბათუმში ავარიულ სახლში მცხოვრებლები დახმარებას ითხოვენ

ბათუმში, ბაგრატიონის #127-ში, ავარიულ სახლში მცხოვრები მოსახლეობა ბათუმის მერიისგან რეაგირებას ითხოვს. აქ ამბობენ, რომ სახლის მდგომარეობა ყოველდღიურად მძიმდება, რადგან სამშენებლო კომპანია „ორბი ლუქს პალასი“ მათ სახლთან ახლოს, მიმდებარე ნაკვეთზე მასშტაბურ მშენებლობას აწარმოებს, რაც რყევებს და მათ სახლზე დამატებითი ბზარების გაჩენას იწვევს.

მოსახლეობის ინფორმაციით, ბაგრატიონის #127- ში მდებარე სახლი ბათუმის მერიის ავარიული სახლების პროგრამაშია. მომზადებულია სამხარაულის ექსპერტიზის დასკვნაც. ამ დასკვნის მიხედვით, სახლის მდგომარეობა საფრთხის შემცველია, მისი აღდგენა კი – არარენტაბელური.

„ეს სახლი დიდი ხანია ავარიულ მდგომარეობაშია. რაც „ორბმა“ მშენებლობა დაიწყო, ჩვენი მდგომარეობა დამძიმდა. სახლი ზანზარებს. ღამითაც მუშაობდნენ, ვიდრე არ ვიჩივლეთ. კომპანიასაც მივმართეთ, მერიასაც მაგრამ ჩვენი მდგომარეობა არავის აინტერესებს.

მერიაში გვითხრეს, რომ ფინანსური რესურსი არ აქვთ. აქ ისეთი მდგომარეობაა, 26 მაისის ქუჩაზე რაც მოხდა, იმაზე უარესი მოხდება. კომპანიამ, ზემოდან თუ დამავალებენ, ავიღებ ამ კორპუსსო. მერიამ უნდა დაავალოს. თუ ჩვენ საკითხს ისევ არ განიხილავენ, იძულებულები ვიქნებით ვიმოქმედოთ, ქუჩას გადავკეტავთ და მანქანებს არ გავატარებთ. მეტი არაფერი დაგვრჩა“ – ამბობს ავარიულ სახლში მცხოვრები ქეთი დიასამიძე.

ბათუმის მერიაში განმარტეს, რომ პროგრამის ფარგლებში მდგრადობის შესაფასებლად ექსპერტიზის დასკვნის მომზადება დააფინანსეს, რაც შეეხება პროგრამაში მონაწილეობას, ამისთვის საჭიროა მესაკუთრეთა 100-პროცენტიანი თანხმობა, რაც მერიას ჯერ არ აქვს.

მოსახლეობა კი ირწმუნება, რომ ყურადღებას არ აქცევენ:

„ვაპირებთ საპროტესტო აქციების გამართვას, ბავშვები გვყავს და გვეშინია. მივედით მერიაში, ერთი კაბინეტიდან მეორეში გაგვიშვეს, მეორიდან – მესამეში, საბოლოოდ ვერაფერი გავიგეთ და არც რაიმე შედეგი დადგა. ერთი მესაკუთრის თანხმობა თუ არ იქნება, სხვები უნდა დავიღუპოთ?“- ამბობენ ბაგრატიონის #127-ში მცხოვრებლები.

ამ სახლთან ახლოს, ბაგრატიონის #127გ-ში შპს „ორბი ლუქს პალასი“ მრავალფუნქციურ კომპლექსს აშენებს. მშენებლობა ერთ ჰექტარზე მიმდინარეობს [10804კვ.მ] მშენებლობის პარამეტრები ვერ დავაზუსტეთ, თუმცა რენდერითაც ირკვევა, რომ პროექტი მასშტაბურია.

მშენებლობის ნებართვა ბათუმის ყოფილმა მერმა, ლაშა კომახიძემ 2019 წლის სექტემბერში გასცა. ნებართვა „ჯეო დეველოპმენტმა“ მიიღო. საჯარო რეესტრის მონაცემებით, კომპანიას უკრაინის მოქალაქე ნატალია ტოვაჩი ფლობდა, მან ასივე პროცენტი ბიზნესმენ ირაკლი სირაძეს მიჰყიდა ფაქტობრივად სიმბოლურ ფასად, 100 ლარად. შემდეგი მყიდველი კი „ორბია“, შესაბამისად ამ კომპანიის საკუთრებაში გადავიდა მიწის ნაკვეთიც, კომპანიამ კი მოგვიანებით მშენებლობის ნებართვაც განაახლა.