სახელმწიფო აუდიტის ინფორმაციით, აჭარის მთავრობამ სოფლების წყალმომარაგების პროგრამისთვის გამოყოფილი სესხი ვერ აითვისა. აუდიტმა ამაზე 2023 წლის რესპუბლიკური ბიუჯეტის ცხრა თვის ანგარიშის შესწავლის შემდეგ დაწერა.
აუდიტის ინფორმაციით, 2022 წლის პირველი ოქტომბრის მდგომარეობით, აჭარის რესპუბლიკური ბიუჯეტის მიერ აღებული სესხების მოცულობა 215 მილიონ 259 140 ლარია, საიდანაც ათვისებულია 57 მილიონ 755 083 ლარი, ხელშეკრულებებით გათვალისწინებული თანხის 26.8%.
„საკრედიტო რესურსი ვერ იქნა ათვისებული აჭარის სოფლების წყალმომარაგებისა და წყალარინების პროგრამისათვის გამოყოფილი სესხის ფარგლებში. კერძოდ, საანგარიშო პერიოდისათვის 40 მილიონი ევროს მოცულობის სესხიდან ათვისებულია 3.2 მილიონი ევრო.“
საკრედიტო ხელშეკრულების შესაბამისად, სესხის აუთვისებელ ნაწილზე ყოველწლიურად ხორციელდება ვალდებულების გადასახადის გადახდა – აუთვისებელი თანხის 0.5%.
აუდიტი წერს, რომ სესხის აუთვისებლობის მიზეზია შესყიდვის განსახორციელებლად გამოცხადებული ტენდერის ორჯერ წარუმატებლად დასრულება.
სახელმწიფო აუდიტის სამსახურის შეფასებით, მნიშვნელოვანია მაკონტროლებელმა უწყებებმა სათანადო მონიტორინგის საშუალებით უზრუნველყონ პროექტის განხორციელების დამაბრკოლებელი გარემოებების დროული გამოვლენა, ნაკლოვანებებზე სათანადო რეაგირება და მოზიდული ფინანსური რესურსის ეფექტიანი გამოყენება.
ამავე თემაზე:
„ზაფხული იწყება აქ“ – ბათუმში ტურისტული სეზონი 15 ივნისს გაიხსნება
