მთავარი,სიახლეები

რუსეთში „ევროვიზიის“ ანალოგის შექმნას გეგმავენ

17.11.2023 • 732
რუსეთში „ევროვიზიის“ ანალოგის შექმნას გეგმავენ

უკრაინაში სრულმასშტაბიანი შეჭრის გამო „ევროვიზიას“ ჩამოცილებული რუსეთი გეგმავს საკუთარი საერთაშორისო მუსიკალური კონკურსი – „ინტერვიზია“ ჩაატაროს. ამავე სახელის კონკურსი ცივი ომის დროს, საბჭოთა ბანაკის ქვეყნებში ტარდებოდა.

გამოცემა „მედუზას“ ცნობით, ამ გეგმის შესახებ რუსეთის კულტურის მინისტრმა, ოლგა ლიუბივომამ განაცხადა.

პირველი კონკურსი, შესაძლოა, უკვე 2024 წელს ჩატარდეს – ამბობს რუსეთის პირველი არხის დირექტორი, კონსტანტინ ერნსტი.

„ამ კონკურსში არ იქნება არანაირი პოლიტიკური შეზღუდვა და გავლენა, ესაა თავისუფალი ტრიბუნა, რომელზეც ყველა ქვეყანას შეუძლია წარმოადგინოს თავისი პოპმუსიკის მაგალითები. იმედი გვაქვს ბრიქსის [ჩინეთის, ინდოეთის, რუსეთის, სამხრეთ აფრიკის და ბრაზილიის გაერთიანება] წევრების აქტიური მონაწილეობის და სხვა ქვეყნებსაც ვთავაზობთ, შემოუერთდნენ ამ ინიციატივას“, – აცხადებს ერნსტი.

უკრაინაში სრულმასშტაბიანი შეჭრის გამო დაწესებული სანქციების ფონზე, რუსეთში მხოლოდ „ევროვიზიის“ ჩანაცვლებას არ ცდილობენ – „იმპორტჩანაცვლება“, როგორც ამას რუსეთის ხელისუფლება უწოდებს, არაერთ სხვა სფეროსაც შეეხო.

ევროპის მაუწყებელთა კავშირმა, რომელიც ყოველწლიურად მუსიკალურ კონკურს „ევროვიზიას“ ატარებს, რუსეთს კონკურსში მონაწილეობა 2022 წლის 25 თებერვალს აუკრძალა, მას შემდეგ, რაც რუსეთი თავს დაესხა უკრაინას.

__________________

ფოტოზე: საახალწლო კონცერტი რუსეთის პირველ არხზე

გადაბეჭდვის წესი


ასევე: