ბათუმში, მე-13 საჯარო სკოლის წინ, ავტობუსის გაჩერებაზე, ათამდე ქართველი მოსწავლე, 3 უკრაინელ მოსწავლეს ფიზიკურად გაუსწორდა. ბავშვებს, როგორც ერთ-ერთი დაზარალებულის მშობელი ამბობს, სახეზე აღენიშნებათ დალურჯებები.
შემთხვევა ბათუმში, 9 ნოემბერს, პარასკევ დღეს მოხდა, დაახლოებით 15:30 წუთზე, სკოლის წინ, ავტობუსის გაჩერებაზე.
„ჩემი შვილი სამ თანაკლასელთან ერთად სკოლიდან მოდიოდა, როცა ავტობუსის გაჩერებაზე ერთი მოზარდი მიუახლოვდა და სიგარეტი სთხოვა. როცა უთხრეს, რომ სიგარეტი არ ჰქონდათ, შემდეგ ფული მოსთხოვეს. ბავშვებს არც ფული ჰქონდათ და ვერ მისცეს.
ამის შემდეგ ის ბიჭი წავიდა და მოიყვანა სხვა ბიჭები, დაახლოებით ათამდე იყვნენ და ჩვენ ბავშვებს ცემა დაუწყეს.
ერთს ძალიან შეეშინდა და ავტომანქანების უკან დაიმალა, 12-13 წლის ბავშვებია ნაცემი, ჩემს შვილსაც სახეში ურტყეს და დანარჩენებსაც – ყურის არეში აქვთ დაზიანებები. მეოთხე დღეა სტკივა სახის მარჯვენა მხარე და აქვს დალურჯებებიც“, – ამბობს „ბათუმელებთან“ ერთი-ერთი დაშავებული უკრაინელი ბავშვის მშობელი ლილია ლისენკო.
როგორც მშობელი ამბობს, ინციდენტის შემდეგ მათ სკოლის დირექტორი დაუკავშირდა და იმავე დღეს განცხადებით მიმართეს პოლიციის განყოფილებას.
„პოლიციას ჩვენება მივეცით, როგორც დაზარალებულმა ბავშვებმა, ასევე ყველა მშობელმა. დაგვპირდნენ, რომ ორშაბათს დაგვიკავშირდებოდნენ და საქმის მსვლელობის შესახებ მოგვაწვდიდნენ ინფორმაციას, თუმცა არავინ დაგვკავშირებია.
დირექტორი ამბობს, რომ ეს არ არის მარტივი პრობლემა, მანდატური კი საქმეში არ ჩარეულა.
ჩხუბის მეორე დღეს, ჩემს შვილს კიდევ დახვდა ერთი მოზარდი, მოსთხოვა სიგარეტი და ისევ წაეძიძგილავა. ჩემი შვილი თავს უსაფრთხოდ არ გრძნობს, ამიტომ აღარ აპირებს სკოლაში სიარულს. ის მოზარდები სულ იქ არიან“, – გვეუბნება დაზარალებული ბავშვის დედა.
„ბათუმელები“ ცდილობს დაუკავშირდეს როგორც მე-20, ასევე მე-13 საჯარო სკოლების დირექტორებს.
რაც შეეხება შს სამინისტროს, როგორც „ბათუმელებს“ ეუბნებიან, გამოძიება სსკ-ის 126 მუხლით მიმდინარეობს, რომელიც გულისხმობს, არასრულწლოვნების მიმართ ჩადენილ ძალადობას.
ბათუმში 900-ზე მეტი უკრაინელი ბავშვი სწავლობს. ისინი საქართველოში 2022 წელს, უკრაინაში რუსეთის მიერ ფართომასშტაბიანი ომის დაწყების შემდეგ ჩამოვიდნენ. ლტოლვილი ბავშვებისთვის უკრაინული სექტორები ბათუმის მე-20 და მე-13 საჯარო სკოლებში გაიხსნა. დაზარალებული ბავშვებიც ამ სკოლებში სწავლობენ.
