თამარ გვარიშვილი ესტონეთში, ტალინში, იურიდიული კომპანია Lex Law Office-ის იურისტია. ტალინში ვილნიუსიდან მოხვდა, სადაც Mykolas Romeris უნივერსიტეტში, მაგისტრატურაზე ევროპისა და საერთაშორისო ბიზნეს სამართალს სწავლობდა.
თამარის კარიერული და საგანმანათლებლო გზა ბათუმში, „თავისუფალ ჟურნალისტთა სახლიდან“ დაიწყო.
„როცა „თავისუფალ ჟურნალისტთა სახლში“ მივედი, ვიცოდი, რომ ჟურნალისტობას არ ვაპირებდი. მაგრამ ეს ორგანიზაცია ბევრ რამეში დამეხმარა. აქ მიღებული ცოდნა მადგება მთელი ცხოვრების და კარიერის განმავლობაში. ამასთან, ძალიან შეცვალა ჩემი პიროვნება.
თუ მანამდე ვიყავი მორცხვი, სწავლაზე ორიენტირებული ბავშვი, „თავისუფალ ჟურნალისტთა სახლში“ საშუალება მომეცა, რომ ჩემი კრეატიულობა გამომევლინა. რესურსები გვქონდა, ტრენინგები გვიტარდებოდა, გვასწავლიდნენ, რა როგორ უნდა გაგვეკეთებინა იმ თემებზე, რაც გვაინტერესებდა,“ – ასე იხსენებს თამარ გვარიშვილი იმ პერიოდს, როცა ჯერ კიდევ სკოლის მოსწავლე „თავისუფალ ჟურნალისტთა სახლში“ მოხვდა.
სკოლის შემდეგ უნივერსიტეტში ჩააბარა და „თავისუფალ ჟურნალისტთა სახლში“ განმეორებით მივიდა სტაჟირებაზე.
„სტუდენტობის დროს ვმუშაობდი უმცირესობების ინტეგრაციაზე აჭარის რეგიონში. მაგ პროექტის დახმარებით ბევრი საინტერესო ადამიანი გავიცანი.
ცოდნა, კონტაქტები და ადამიანები, პირველ რიგში ეს მომცა „თავისუფალ ჟურნალისტთა სახლმა“. ყოველ დღე, სკოლის შემდეგ, მიუხედავად იმისა, რომ მოხალისეობა იყო და არანაირი ვალდებულება არ მქონდა მისვლის, აუცილებლად მივდიოდი ორგანიზაციის ოფისში, იმისთვის, რომ ჩემ თანატოლებთან ერთად რაღაცები დამეგეგმა.
ჩემთვის ყველაზე გამორჩეული იყო თანატოლგანმანათლებლობა. ჯერ გვიტარდებოდა ტრენინგები დემოკრატიასა და ადამიანის უფლებებთან დაკავშირებულ თემებზე. მერე ჩვენ თვითონ ვამუშავებდით იგივე თემას, ვამზადებდით პრეზენტაციებს და მივდიოდით მაღალმთიანი აჭარის სოფლებში ამ ცოდნის გასავრცელებლად ჩვენივე თანატოლებთან.
თანატოლგანმანათლებლად ყოფნა დამეხმარა უნივერსიტეტშიც. მხოლოდ სკოლაში გაკვეთილის მოყოლა არაა საკმარისია იმისთვის, გამოიმუშაო უნარი და გამბედაობა, რომ გააკეთო პრეზენტაციები უნივერსიტეტში დიდი აუდიტორიის წინაშე.
მნიშვნელოვან რესურსებზე გვქონდა წვდომა „თავისუფალ ჟურნალისტთა სახლში“. პირველ რიგში ეს იყო ტექნიკა, რომელიც საჭიროა იმისათვის, რომ მოამზადო სიუჟეტი, დაგეგმო ტრენინგი, ლექცია და ა.შ.
ყველაფრის გადასაღებად, ჩასაწერად, დასამონტაჟებლად სტუდია გვქონდა, სადაც გადაცემებს ვწერდით. ამ ყველაფერზე აბსოლუტურად შეუზღუდავი ხელმისაწვდომობა ჰქონდათ ახალგაზრდებს.
გარდა ხელმისაწვდომობისა, გვასწავლიდნენ როგორ უნდა გამოგვეყენებინა ესა თუ ის ხელსაწყო – ხმის ჩამწერი მოწყობილობა თუ კამერა.
ამ ორგანიზაციაში მოხვედრა ძალიან მნიშვნელოვანი აღმოჩნდა ჩემთვის. გავიუმჯობესე საჯაროდ გამოსვლის, კომუნიკაციის და საქმის დაგეგმვის უნარები.
და ის ფაქტი, რომ ეს ყველაფერი უფასოდაა ხელმისაწვდომი, ჩემი აზრით მნიშვნელოვანია არამარტო ბათუმელი, არამედ აჭარაში მცხოვრები ახალგაზრდებისთვის – „თავისუფალ ჟურნალისტთა სახლის“ მუშაობა არ შემოიფარგლება ბათუმით მხოლოდ,“ – ამბობს თამარ გვარიშვილი.
თამარის თქმით, ის გამოცდილება, რაც „თავისუფალ ჟურნალისტთა სახლში“ მიიღო, შეუფასებელია. რადგან ორგანიზაციამ მის როგორც კარიერულ, ისე პიროვნულ უნარების ჩამოყალიბებაზე მოახდინა ზეგავლენა.
„უფრო გამბედავი და უფრო თავდაჯერებული გავხდი. პროფესიის არჩევაშიც ჰქონდა ძალიან დიდი წვლილი. იმიტომ, რომ ჩვენ ბევრს ვლაპარაკობდით მაშინ ადამიანის უფლებებზე და დემოკრატიაზე. ძალიან ბევრ ინფორმაციას ვიღებდით. პროფესიას რომ ვირჩევდი, თავი მზად ვიგრძენი სამართლის სასწავლად, – ვთვლიდი, რომ რაღაც ცოდნა მქონდა უკვე ამ სფეროში, რაც შემეძლო კიდევ უფრო განმევითარებინა.
ზოგჯერ ვფიქრობ, შეიძლება ეს ორგანიზაცია რომ არა, პროფესიაც კი არ ამერჩია ის, რაც ახლა მაქვს. უნარებს რაც შეეხება, ხანდახან თუ არასამართლებრივი დავალებებიც მაქვს ხოლმე სამსახურში, რაღაც პრეზენტაციებთან დაკავშირებით, ვიდეოს მომზადებასთან დაკავშირებით და ა.შ. არის ეგეთი სიტუაციებიც, მაშინ ძალიან მადგება კიდევ ერთხელ მანდ მიღებული გამოცდილება.
იმდენად ბუნებრივად არის ჩემში ეს ცოდნა, ზოგჯერ ვერც ვიაზრებ ხოლმე, რომ სინამდვილეში „თავისუფალ ჟურნალისტთა სახლიდან“ მიღებული გამოცდილებაა,“ – ამბობს თამარ გვარიშვილი.
„თავისუფალ ჟურნალისტთა სახლის“ შესახებ
თავისუფალ ჟურნალისტთა სახლი უკვე 22 წლისაა.
„თავისუფალ ჟურნალისტთა სახლი“ იყო პირველი არასამთავრობო ორგანიზაცია აჭარაში, რომელიც გაზეთ „ბათუმელების“ ჟურნალისტებმა დააფუძნეს 2001 წლის 20 ოქტომბერს.
ორგანიზაციამ ოფიციალური რეგისტრაცია ბათუმის სასამართლოში 2001 წლის 20 ნოემბერს გაიარა.
„თავისუფალ ჟურნალისტთა სახლის“ ორგანიზებით მოეწყო საპროტესტო მსვლელობა აჭარის ტელევიზიაში არსებული ცენზურის წინააღმდეგ. 2009 წლის „ვარდების რევოლუციის“ შემდეგ ეს იყო ერთადერთი შემთხვევა მთელ ქვეყანაში, ვინც მედიასფეროში არსებული ცენზურა გააპროტესტა.
აჭარის რევოლუციის დროს ორგანიზაცია მასპინძლობდა უცხოური (ნიუ-იორკ თაიმსის, ბი-ბი-სის, ფრანს-პრესის, კომერსანტის, დოიჩე ველეს) და საქართველოს ნაციონალურ საინფორმაციო საშუალებების ჟურნალისტებს და მათ მუშაობის პროცესში ეხმარებოდა.
დაფუძნების მომენტიდან „თავისუფალ ჟურნალისტთა სახლმა“ სხვადასხვა პროექტის განხორციელების პარალელურად ჩაატარა არაერთი ტრენინგი ჟურნალისტებისთვის, გამართა მრგვალი მაგიდა და კონფერენციები. ორგანიზაცია ახორციელებდა და ახორციელებს თავის საქმიანობას შემდეგი მიმართულებით.
- ინფორმაციის თავისუფლებისა და გამჭვირვალობის ხელშეწყობა;
- ჟურნალისტების პროფესიული დონის ამაღლება და დაოსტატება;
- სამოქალაქო საზოგადოების ფორმირების ხელშეწყობა;
სამოქალაქო საზოგადოების განვითარების ხელშეწყობის მიზნით სხვადასხვა სახის კონსულტაციას უწევს დაინტერესებულ მოქალაქეებს, როგორც მათი ინფორმირების, ასევე უფლებების დაცვის კუთხით.
ორგანიზაციას დღემდე 60-მდე პროექტი აქვს განხორციელებული.
