თურქული მედიის ცნობით, თურქეთის შავი ზღვის რეგიონს ფაროსანა შეესია. მედია წერს, რომ მწერების რაოდენობა სტაბილურად იზრდება და შავი ზღვის რეგიონში საფრთხეს უქმნის სოფლის მეურნეობის სხვადასხვა პროდუქტს, განსაკუთრებით კი – თხილს.
„მწერი, რომელიც ყოველდღიურად 30 კილომეტრს ფარავს, თურქეთში საქართველოდან 7 წლის წინ შემოვიდა“ – წერს თურქული გამოცემა „ჰურიეთი“.
მწერებთან საბრძოლველად გამოიყენება როგორც ბიოლოგიური და ქიმიური, ასევე ხელით შეგროვების მეთოდიც. თურქული მედიის ცნობით, მიმდინარე წელს მავნებელთან საბრძოლველად ართვინის რეგიონში ჩინეთიდან 30 000-ზე მეტი „სამურაი ფუტკარი“ შეიყვანეს.
თურქეთში მწერებით მიყენებული ეკონომიკური ზარალი ყოველწლიურად 5 მილიარდ თურქულ ლირას უტოლდება.
თურქეთის თხილის ეროვნული საბჭოს (UFK) შეფასებით, მომავალ წელს მწერის პოპულაცია იმდენად გაიზრდება, რომ, შესაძლოა, ზიანი მიადგეს თხილის 80 %-ს. UFK – ის დირექტორთა საბჭოს წევრის შეფასებით, რეგიონი, შესაძლოა, კატასტროფის წინაშე აღმოჩნდეს. „მიუხედავად იმისა, რომ შედეგს სამი წლის შემდეგ ვიხილავთ, ქიმიური ომი აუცილებელია“ – ვკითხულობთ თურქულ მედიაში.
საქართველო აზიურ ფაროსანას უკვე მე-8 წელია ებრძვის. სურსათის ეროვნული სააგენტოს განცხადებით, მიმდინარე წელს აზიურ ფაროსანასთან ბრძოლის მართვის ცენტრმა სპეციალიზებული ტექნიკის გამოყენებით დასავლეთ საქართველოში – სამეგრელოს, გურიის, იმერეთის, რაჭის რეგიონებსა და აჭარაში თერმული ნისლის ტექნოლოგიით უკვე დაამუშავა 227 148 ჰა ფართობი, ცივი შესხურებით – 91 579,25 ჰა სოფლის ტერიტორია, სიმინდის მასივები, ჯაგნარები და ტყის პერიმეტრი.
____________
