აჭარის სამინისტროებში, აჭარის მთავრობაში, უმაღლეს საბჭოსა და მერიაში არ მალავენ, რომ მათი თანამშრომლების ნაწილი დღეს, 29 აპრილს, თბილისში წავიდნენ „ოცნების“ მიერ ორგანიზებულ კონტრაქციაზე, თუმცა რაოდენობას არ აზუსტებენ.
„ბათუმელები“ ამ შეკითხვით დაუკავშირდა ოთხივე სამინისტროსა და აჭარის უმაღლეს საბჭოს, თუმცა უწყებებში აქციაზე წასული თანამშრომლების რაოდენობას არ აზუსტებენ. აქ გვითხრეს ინფორმაცია წერილობით გამოგვეთხოვა.
სატელეფონო ზარებს არ პასუხობენ აჭარის მთავრობის პრესსამსახურში.
დღეს, დილის 7 საათიდან საჯარო მოხელეების და „ოცნების“ აქტივისტების მობილიზება იყო ბათუმის სტადიონთან, საიდანაც სამარშრუტო მიკროავტობუსებით აჭარიდან თბილისის აქციაზე მმართველი პარტიის მხარდამჭერები გაემგზავრნენ. აქციაზე წავიდნენ სხვადასხვა სკოლის პედაგოგები, შპს-ების, აიპებისა და სსიპების თანამშრომლები.
დღეს, 29 აპრილს, საღამოს „ქართული ოცნება“ თბილისში, პარლამენტთან რუსული კანონის მხარდასაჭერად კონტრაქციას აანონსებს. ცნობილია, რომ აქციის მონაწილეებს მიმართავს ბიძინა ივანიშვილი, „ოცნების“ საპატიო თავმჯდომარე, რომელიც გასულ წლის ბოლოს ოფიციალურად დაბრუნდა პოლიტიკაში.
______________
ფოტოზე: ბათუმი, 29 აპრილი, კონტრაქციაზე მიმავალი მოქალაქეები. ფოტო: „ბათუმელები“/მანანა ქველიაშვილი
