ქობულეთის მეორე საჯარო სკოლის ქართული ენის მასწავლებელი სკოლიდან დაითხოვეს.
როგორც სკოლის დირექტორი ნანი ცივაძე „ბათუმელებთან“ საუბარში ამბობს, მასწავლებლის დათხოვნის მიზეზი ბავშვზე ძალადობაა. შემთხვევა რამდენიმე დღის წინ მოხდა.
„ორი კვირის წინ იყო ინციდენტი, საგაკვეთილო პროცესში ქართულის გაკვეთილზე მასწავლებელმა თმა მოქაჩა მოსწავლეს და როგორც კი ეს ფაქტი ცნობილი გახდა, დაიწყო დისციპლინური მოკვლევა, მასწავლებელმა მოკვლევის დაწყებისთანავე დაწერა განცხადება და საკუთარი სურვილით წავიდა სკოლიდან“ – გვითხრა სკოლის დირექტორმა.
ის ადასტურებს ინფორმაციას, რომ აღნიშნული ფაქტი მოსწავლეებმა ტელეფონით გადაიღეს და სოციალურ ქსელში გაავრცელეს.
„ჩვენთვისაც ეს ფაქტი სოციალური ქსელის მეშვეობით გახდა ცნობილი“- ამბობს ნანი ცივაძე.
დირექტორის განმარტებით, მოსწავლის ფიზიკური შეურაცხყოფის შემთხვევაში კანონი ითვალისწინებს მასწავლებლის მხრიდან სკოლის დატოვებას.
ინფორმაცია ფაქტის შესახებ პირველად TV 25-მა გაავრცელა.
ეს უკვე მეორე მასწავლებელია, რომელმაც ბავშვზე ძალადობის გამო სკოლა დატოვა. პირველი ინციდენტი მიმდინარე წლის მაისში მოხდა, როცა მასწავლებელმა მოსწავლეებს სიტყვიერი შეურაცხყოფა მიაყენა.
აღნიშნული შემთხვევაც მოსწავლეებმა ტელეფონით გადაიღეს. მაშინაც მუსიკის მასწავლებელმა სკოლა დისციპლინური საბჭოს მოკვლევის დაწყებისთანავე დატოვა.
