საახალწლო დღეებში ქალაქის გაფორმებისთვის და სხვადასხვა მანათობელი კონსტრუქციების შესაძენად ბათუმის მერიამ 5 მილიონი ლარი გამოყო. ამ თანხაში შედის საახალწლო ნაძვის ხის მონტაჟი და ასევე, სადემონტაჟო სამუშაოებიც.
„ქალაქ ბათუმში საშობაო-საახალწლო დღეებში ქალაქის გაფორმებისთვის საახალწლო მანათობელი კონსტრუქციების და სხვადასხვა მოწყობილობის [თანმდევი მომსახურება მონტაჟით-დემონტაჟი] სახელმწიფო შესყიდვაზე“ ტენდერი მერიის საქალაქო ინფრასტრუქტურისა და კეთილმოწყობის სამმართველომ უკვე გამოაცხადა 5 მილიონ 159 ათასი ლარით. ამ თანხაში არ შედის გასართობი ღონისძიებები.
პირობის მიხედვით:
- შესასყიდი მანათობელი კონსტრუქციების საგარანტიო ვადა არანკლებ 5 წელი უნდა იყოს.
- სამონტაჟო სამუშაოები უნდა განხორციელდეს ხელშეკრულების გაფორმებიდან 2023 წლის 25 დეკემბრის ჩათვლით; კონკრეტულ მისამართებს და სამონტაჟო კონცეფციას ტენდერში გამარჯვებულს მერიის სამმართველო წერილობით აცნობებს.
- სადემონტაჟო სამუშაოები უნდა განხორციელდეს 2024 წლის 15 თებერვლის ჩათვლით;
- შემდგომი გამოყენებისათვის ვარგისი, ასევე დაზიანებული [რომელიც ექვემდებარება შეკეთებას შემდგომში გამოყენების შესაძლებლობით] და შემდგომში გამოსაყენებლად უვარგისი ყველა საახალწლო აქსესუარის რაოდენობრივი ჩამონათვალის წარმოდგენა უნდა განხორციელდეს 2024 წლის 1-ელი მარტის ჩათვლით.
- ყველა დაზიანებული, მაგრამ რემონტს დაქვემდებარებული და შემდგომი გამოყენებისათვის ვარგისი საახალწლო აქსესუარის შეკეთება შემდგომი დასაწყობებით უნდა განხორციელდეს 2024 წლის 25 მარტის ჩათვლით.
რაც შეეხება ტენდერში მონაწილეობის მსურველის გამოცდილებას, მერიის სამმართველოს მოთხოვნა ასეთია:
„ტენდერში მონაწილე პრეტენდენტს უკანასკნელი წლების განმავლობაში [2020 წლის სექტემრიდან ტენდერის გამოცხადების დღემდე] შესრულებული უნდა ჰქონდეს ტენდერით გათვალისწინებული ანალოგიური ხასიათის, სირთულისა და შინაარსის სამუშაოები [საშობაო-საახალწლო მანათობელი კონსტრუქციების მიწოდება მონტაჟი, გარე განათების მონტაჟი ან/და საშობაო-საახალწლო დღეებში ქალაქის გაფორმება] საერთო ღირებულებით არანაკლებ 5 მილიონი ლარის ოდენობით“.
ასეთი გამოცდილება აჭარაში ფაქტობრივად ერთ კომპანიას – „აჭარგანათებას“აქვს, რომლისგანაც ქალაქის მერიამ შარშან 968 ათას 387 ლარად საახალწლო ნაძვის ხეც შეისყიდა.
მერიის სამმართველოს სატენდერო კომისიის შესაბამის ოქმში კი, აღნიშნულია, რომ ტენდერის გამოცხადებამდე ჩაატარეს ბაზრის კვლევა, რომელსაც „2 პოტენციური მიმწოდებელი გამოეხმაურა“:
ტენდერში წინადადებების მიღება 2023 წლის 3 ნოემბერს დასრულდება.
გასულ, 2022 წელს, ბათუმის საახალწლოდ გაფორმებისთვის 2 მილიონამდე ლარი იყო გამოყოფილი.
ამავე თემაზე „ბათუმელების“ არქივიდან:
https://batumelebi.netgazeti.ge/news/455345/
