შაბათს, 9 სექტემბერს, პორტუგალიის პატარა ქალაქ ლევირაში მდებარე ლიქიორისა და ღვინის ქარხანაში ორი ავზი გასკდა და ქალაქის ქუჩებში 2,2 მილიონი ლიტრი ღვინო დაიღვარა.
სოციალურ მედიაში ამ ფაქტის ამსახველი არაერთი ვიდეო გავრცელდა, რომელშიც ჩანს, როგორ მოედინება ღვინის მდინარე ქალაქის ქუჩაში.
მედიის ცნობით, ღვინის მდინარე ქუჩაში დაახლოებით ერთი საათის განმავლობაში მოდიოდა, მაგრამ ძლიერი სუნი არ დაუტოვებია, „რადგან ეს იყო კარგი ხარისხის ღვინო“ – უთხრა New York Times-ს კომპანიის დირექტორმა.
შემთხვევის შედეგად არავინ დაშავებულა. მედიის ცნობით, დაიტბორა მხოლოდ ერთი მარანი.
კომპანია Destilaria Levira-მ, რომელსაც ეკუთვნის აღნიშნული ქარხანა, ფეისბუქზე ბოდიში მოიხადა და პასუხისმგებლობა აიღო დასუფთავებაზე.
ქუჩების ღვინისგან გასაწმენდად სახანძრო ტექნიკა იყო გამოყენებული, რითაც თავიდან იქნა არიდებული მდინარეში ღვინის ჩადინება.
