უკრაინის შეიარაღებული ძალების ცნობით, უკრაინელმა მებრძოლებმა სრულად გაათავისუფლეს ოკუპაციისგან სოფელი რობოტინო ზაპოროჟიეს ოლქში.
„თქვენ იცით, რომ რობოტინო განთავისუფლდა და ჩვენი ჯარები მოძრაობენ რობოტინოს სამხრეთ-აღმოსავლეთით და მალაია ტოკმაჩკას სამხრეთით. ეს ის მიმართულებებია, რომლებისკენაც ახლა ჩვენი ძალები მიიწევენ წინ, მიუხედავად მტრის სასტიკი წინააღმდეგობისა“, – განაცხადა უკრაინის თავდაცვის მინისტრის მოადგილემ, ანა მალიარმა.
მალიარმა ასევე დასძინა, რომ უკრაინელმა ჯარებმა რუსული ოკუპაციისგან გაათავისუფლეს 1 კვ. კმ ბახმუტის მიმართულებით.
ომის კვლევის ამერიკული ინსტიტუტის შეფასებით, უკრაინის წინსვლა რობოტინოსთან ტაქტიკურად მნიშვნელოვანია და წინსვლა ამ რაიონში, სავარაუდოდ, მიზნად ისახავს რუსული ძალების დასუსტებას, რომელთაც მნიშვნელოვანი ძალისხმევა, რესურსები და პერსონალი ჩადეს რობოტინოს გარშემო პოზიციების დასაკავებლად.
