ბათუმის საკრებულოს წევრი თეკლა კავაზაშვილი საბავშვო ატრაქციონების უსაფრთხოებასთან დაკავშირებით, მერიისგან ინფორმაციას ისევ ითხოვს.
თუმცა უშედეგოდ.
„უკვე ზაფხულია, ძალიან ბევრი ბავშვია ბათუმში, დამსვენებელიც დაემატა და გაიზარდა მიმართვიანობა საბავშვო ატრაქციონებზე. ყველას ძალიან კარგად გვახსოვს ტრაგედია და ის საშინელი შედეგი, რაც დადგა სტიქიის დროს ბათუმში, რამდენიმე თვის წინ. ვიცი, რომ კანონი არ არის მოწესრიგებული და არ არსებობს ის ნორმატიული აქტები, რომლებიც გვიკარნახებს, როგორ უნდა იყოს ეს ატრაქციონები გამართული“, – განაცხადა საკრებულოს წევრმა.
საკრებულოს თავმჯდომარემ, რამაზ ჯინჭარაძემ განმარტა, რომ, მისი აზრით, მოქმედი ატრაქციონების მფლობელებს უნდა ჰქონდეთ დასკვნები, რომ ისინი უსაფრთხო და გამართულია.
თეკლა კავაზაშვილმა საკრებულოს შესთავაზა, მიმართონ საქართველოს პარლამენტს, იმუშაოს კანონის ამ მიმართულებით მოწესრიგებაზე. ამას თავმჯდომარეც დაეთანხმა.
თეკლა კავაზაშვილმა მოითხოვა ასევე შემდეგ სხდომაზე ბულვარის ადმინისტრაციის დირექტორის დასწრება: „იქნებ ამ საკითხზე ერთად ვიმუშაოთ“.
საკრებულოს წევრმა, თეკლა კავაზაშვილმა, მოგვიანებით „ბათუმელებთან“ განმარტა, რომ მერია, ფაქტობრივად, ვერ აწვდის ინფორმაციას საკრებულოს, რამდენად უსაფრთხოა საბავშვო ატრაქციონები ბათუმის ბულვარში:
„ამბობენ, რომ წელიწადში ერთხელ უნდა შემოწმდეს, მაგრამ მოწმდება თუ არა, ამას ვერ გვეუბნება ვერავინ, ვერც მერია და ვერც ბულვარის ადმინისტრაცია. არც ის ვიცით, ბოლოს როდის შემოწმდა ატრაქციონები.“
იგივე მოთხოვნა რამდენიმე სხდომის წინ საკრებულოს წევრმა „ლელოდან“ ვაჟა დარჩიამაც გაახმოვანა. მისი თქმით, მას ამ საკითხზე ბულვარის ადმინისტრაციის ხელმძღვანელთან შეხვედრაც სურდა, თუმცა ამ დრომდე ვერ მოახერხა და არც პასუხები აქვს მერიისგან.
ატრაქციონების უსაფრთხოების საკითხს „ოცნებიდან“ საკრებულოს თავმჯდომარის მოადგილე ნატალია ზოიძე გამოეხმაურა. მისი ინფორმაციით, მაღალი კონსტრუქციის მქონე ატრაქციონების შემოწმება წელიწადში ერთხელ ეკონომიკის სამინისტროს ევალება, შესაბამისი მიმართვის საფუძველზე.
„რაც შეეხება ბატუტს, ამასთან დაკავშირებით გეთანხმებით, უნდა შემუშავდეს წესები, რადგან ყველაზე რბილი ატრაქციონი იყო და აღმოჩნდა ტრაგიკული“, – განაცხადა ნატალია ზოიძემ.
„ოცნების“ ფრაქციის თავმჯდომარემ ასევე განმარტა, რომ „დაწყებულია შრომის უსაფრთხოების ინჟინრების გადამზადება – ყველა სამსახური ვალდებული იქნება ჰყავდეს ასეთი სპეციალისტი, ბევრ სამსახურში უკვე დანერგილია ასეთი შტატი.“
___
12 მარტს, გვიან ღამით, ბათუმის ბულვარში ბატუტზე 9 წლის ბავშვი დაიღუპა. შსს-ს ინფორმაციით, ბათუმის ბულვარში მდებარე ე.წ. ბატუტი ძლიერი ქარის გამო გადაბრუნდა, რა დროსაც კონსტრუქციაზე მყოფი მცირეწლოვანი ძმები დაშავდნენ, ერთ-ერთი მიღებული დაზიანებების შედეგად დაიღუპა. მეორე ბავშვი კი თურქეთის კლინიკაში გადაიყვანეს.
მომხდარის გამო დაშავდა კიდევ ერთი მოქალაქე.
პოლიციამ 1 პირი დააკავა.
„საგამოძიებო მოქმედებების შედეგად დადგინდა, რომ ბრალდებული პასუხისმგებელი იყო ბულვარში განთავსებული აღნიშნული ე.წ. ბატუტის უსაფრთხოებასა და ექსპლუატაციის წესების დაცვაზე, თუმცა მან დაკისრებული ვალდებულებების შესრულება ვერ უზრუნველყო,“ – განმარტეს შსს-ს განცხადებაში.
ბავშვის დაღუპვის შემდეგ „ბათუმელებმა“ შესაბამის უწყებებს წერილობით მიმართა იმის გასარკვევად, რამდენად უსაფრთხოა ბათუმის ბულვარში სხვა ატრაქციონები და შეამოწმეს თუ არა ეს ატრაქციონები საერთოდ. ყველა სამსახურმა ეს კითხვები უპასუხოდ დატოვა. უპასუხოდ რჩება ასევე კითხვა, რატომ იყო ბატუტის უსაფრთხოებაზე მხოლოდ მისი მესაკუთრე პასუხისმგებელი და რატომ ტოვებს სახელმწიფო ბავშვის უსაფრთხოებას ბატუტის მფლობელის კეთილსინდისიერებაზე?
თუ მართლაც საქმე გვაქვს საკანონმდებლო ხარვეზთან, რატომ არ არის მისი შეცვლა პირველი რიგის ამოცანა, მაშინ, როცა უკანონო შენობების დაკანონებაზე კანონი პარლამენტმა დაჩქარებული წესით მიიღო? – პასუხი ჯერჯერობით არც ამაზე გვაქვს
