„ხომ არ გიფიქრიათ, რომ კონტროლიორები გაჩერებაზე კი არ ამოწმებდნენ ბარათებს, არამედ ერთი გაჩერებიდან მეორემდე მაინც იმგზავრონ და პარალელურად შეამოწმონ? დილით ყველას გვაგვიანდება, ამ დროს კი დანიშნულების ადგილამდე ორჯერ მაინც ჩერდება ავტობუსი ბარათების შესამოწმებლად“, – ეს ერთ-ერთ ბოლო ინფორმაციაზე დაუკომენტარეს „ბათუმის ავტოტრანსპორტს“ მათსავე ოფიციალურ ფეისბუკგვერდზე.
„ავტოტრანსპორტს“ კომენტარზე პასუხი არ გაუცია.
კონტროლიორები კი, რომლებსაც მგზავრები ანალოგიურ კითხვებს თითქმის ყოველ ავტობუსში და ყოველი კონტროლისას უსვამენ, მუდმივად ერთსა და იმავეს პასუხობენ: „მიმართეთ მერიას… ჩვენ რასაც გვავალებენ იმას ვაკეთებთ“.
უბილეთო მგზავრობის შემოწმებას ავტობუსში მინიმუმ 1 წუთიდან [თუ ცოტა მგზავრია] 5 წუთამდე დრო მაინც სჭირდება [თუ არ გავითვალისწინებთ კონტროლიორებისა და მგზავრების კამათს; ტექნიკურ ხარვეზებს – როცა მგზავრი ამბობს, რომ გადაიხადა, მაგრამ ეუბნებიან, რომ „არ ჩანს გადახდა“; ზოგჯერ საკონტროლო აპარატი არ მუშაობს; ზოგი მგზავრი კი ეუბნება კონტროლიორს, რომ შეგნებულად არ აჩვენებს მგზავრობის ბარათს და ა.შ. ამასთან, თუ გაჩერებაზე ვინმე ჩადის, კონტროლიორები ჯერ ჩასულ მგზავრებს ამოწმებენ და შემდეგ ადიან ავტობუსში.]
კონტროლიორები, რომლებიც ავტობუსებში უბილეთო მგზავრობას ამოწმებენ, მერიის მუნიციპალური ინსპექციის თანამშრომლები არიან და არა „ავტოტრანსპორტის“; თავად ინსპექცია და „ავტოტრანსპორტი“ კი – ორთავე ბათუმის მერიას ექვემდებარება.
„ბათუმელებმა“ ქალაქის მერიას, მუნიციპალურ ინსპექციას და შპს „ბათუმის ავტოტრანსპორტს“ ცალ-ცალკე, ოფიციალური წერილებით 2023 წლის 10 მაისს მიმართა. ერთ-ერთი შეკითხვა სწორედ უბილეთო მგზავრობის კონტროლის პერიოდში ავტობუსის მოძრაობის შეწყვეტას ეხებოდა.
ოფიციალურ წერილს ქალაქის მერიამ და „ავტოტრანსპორტმა“ დღემდე საერთოდ არ უპასუხა, ინსპექციამ კი, 1 თვის შემდეგ გვიპასუხა და ისიც ნაწილობრივ.
„ბათუმელები“ ითხოვდა მოეწოდებინათ „შესაბამისი დოკუმენტის ელექტრონული ასლი, რომლითაც განსაზღვრულია, რომ კონტროლიორის მიერ მგზავრების შემოწმების პერიოდში ავტობუსმა უნდა შეწყვიტოს მოძრაობა.“
ასევე დასმული გვქონდა შეკითხვა – „რატომ არ ხერხდება აღნიშნული კონტროლი განხორციელდეს ისე, რომ არ შეფერხდეს ავტობუსის მოძრაობა?“
ამ შეკითხვებზე მხოლოდ ინსპექციიდან მივიღეთ პასუხი: „მგზავრთა ნაკადების ზედამხედველობის განყოფილების მიერ ხორციელდება ყოველდღიურად სხვადასხვა ლოკაციებზე კონტროლი. ლოკაციებზე ხორციელდება სხვადასხვა ხაზის ავტობუსების შემოწმება და უბილეთო მგზავრების ჩამოყვანა და დაჯარიმება ადმინისტრაციული სამართალდარღვევის მუხლით 130 მეოთხე ნაწილით“.
ვითხოვდით ასევე ინფორმაციას, თუ „რამდენი კონტროლიორია დასაქმებული დღეის მდგომარეობით და რამდენია ანაზღაურება აღნიშნულ პოზიციაზე“.
ინსპექციამ დასაქმებულთა რაოდენობა მოგვწერა, თუმცა რამდენია ხელფასი ამ პოზიციაზე – დამალა.
„ქ. ბათუმის მუნიციპალური ინსპექციის მგზავრთა ნაკადების ზედამხედველობის განყოფილებაში დასაქმებულია 42 თანამშრომელი.“ – მოგვწერეს ინსპექციიდან.
ამავე თემაზე:
https://batumelebi.netgazeti.ge/news/482788/
