საზოგადოებრივი მაუწყებლის აჭარის ტელევიზიასა და რადიოს კიდევ ერთმა გათავისუფლებულმა თანამშრომელმა მოუგო სასამართლო დავა – მალხაზ რეხვიაშვილის საქმეზე ბათუმის საქალაქო სასამართლომ დღეს, 27 აპრილს, უკანონო გათავისუფლება დაადგინა.
აჭარის ტელევიზიიდან გათავისუფლებულ ჟურნალისტებს შორის შორენა ღლონტის საქმეზეც სასამართლომ უკანონო გათავისუფლება დაადგინა. რამდენიმე ჟურნალისტის სარჩელი კი, სასამართლოს ჯერ არ განუხილავს.
მალხაზ რეხვიაშვილი აჭარის ტელევიზიიდან 2020 წელს გაუშვეს ფეისბუქში გამოქვეყნებული სტატუსის გამო, რითაც მან ჟურნალისტ თეონა თურმანიძეს მხარი დაუჭირა.
მოსამართლე გულიკო კაჟაშვილმა მალხაზ რეხვიაშვილის შემთხვევაში ბათილად მიიჩნია ის ბრძანება, რომლითაც მალხაზ რეხვიაშვილი სამსახურიდან გაუშვეს.
ბათუმის საქალაქო სასამართლოს გადაწყვეტილებით, მალხაზ რეხვიაშვილს აჭარის ტელევიზიამ კომპენსაციის სახით უნდა გადაუხადოს 5 ათასი ლარი. რაც შეეხება სამსახურში აღდგენის მოთხოვნას, მოსამართლემ ეს არ დააკმაყოფილა.
„მოსამართლემ განმარტა, რომ ის პოზიცია აღარ არსებობს, რაზეც ვმუშაობდი, ვმუშაობდი გადაცემა „ჰეშთეგში“ წამყვან-რეპორტიორის პოზიციაზე,“ – ამბობს მალხაზ რეხვიაშვილი.
„მნიშვნელოვანია, რომ სასამართლომ დაადასტურა უკანონო გათავისუფლება… სასამართლოს უნდა ემსჯელა ტოლფასი თანამდებობის საკითხზე. გადაწყვეტილების დასაბუთების გაცნობის შემდეგ გვექნება პოზიცია ამ საკითხზე,“ – ამბობს თათია კაჭარავა, „სოციალური სამართლიანობის ცენტრის“ იურისტი.
——————
აჭარის ტელევიზიაში ჟურნალისტების დევნა და სამსახურიდან გათავისუფლება მას შემდეგ დაიწყო, როცა ტელევიზიის დირექტორი, ნათია კაპანაძე იმპიჩმენტით გაუშვეს. სარჩელების დიდი ნაწილი 2020 წლიდან ამ დრომდე განხილული არ არის. ნათია კაპანაძის სარჩელი 2022 წელს მოსამართლე ჯუმბერ ბეჟანიძემ არ დააკმაყოფილა. კაპანაძე ამჯერად უზენაესი სასამართლოს გადაწყვეტილებას ელის.
