მთავარი,სიახლეები

როგორ აგროვებენ ფულს წალკაში სკოლის მოსწავლეები „ციფრული ოთახისთვის“

14.04.2023 • 1360
როგორ აგროვებენ ფულს წალკაში სკოლის მოსწავლეები „ციფრული ოთახისთვის“

წალკაში, სოფელ ტბეთის სკოლის მოსწავლეების „ციფრული ოთახის“ მოსაწყობად „ორბელიანი მეტზე“ თანხის შეგროვების კამპანია დაიწყო.

ეს სკოლა წალკის მე-2 საჯარო სკოლას მიერთებული სკოლაა, რომელსაც 32 მოსწავლე და 6 მასწავლებელი ჰყავს. აქ მხოლოდ მეექვსე კლასის ჩათვლით ასწავლიან.

რა სჭირდებათ ამ სკოლის მოსწავლეებს კიდევ უფრო ნაყოფიერი სწავლისთვის და რა გზებით ცდილობენ მასწავლებლები ამ რესურსების მოძიებას, ამის შესახებ ინგლისური ენისა და ბუნების მასწავლებელი, სოფო თავართქილაძე გვესაუბრა, რომელიც უკვე 7 წელია, რაც ამ სკოლის მოსწავლეებს ასწავლის. მისი თქმით, სკოლა, მოსწავლეების მცირე რაოდენობის მიუხედავად, ძალიან მრავალფეროვანია. მოსწავლეები ძირითადად სვანეთიდან და აჭარიდან წალკაში ჩასახლებული ეკომიგრანტების ოჯახებიდან არიან, ჰყავთ ბერძენი მოსწავლეებიც.

„სკოლაში რესურსების არქონა ყველა ნაბიჯზე გვაფერხებს, რადგან დღეს ყველაფერი კომპიუტერითაა საკეთებელი, შეეხება ეს არაფორმალურ თუ არაფორმალურ განათლებას.

გჭირდება პრინტერი, კომპიუტერი, მონიტორი, რომ მოსწავლეს სრულყოფილად მიაწოდო ინფორმაცია.

ხშირად გვაქვს კომპლექსური დავალებები, რომელთა შესრულებასაც სჭირდება მასალის ამობეჭდვა, ინფორმაციის მოძიება. აბსოლუტურად ვერაფერს ვერ ვაკეთებთ, რადგან სკოლაში  ერთადერთი და ძალიან ძველი კომპიუტერია. 32 მოსწავლეს და 6 მასწავლებელს გვიწევს აი, ამ ერთ კომპიუტერთან მუშაობა. გვიწევს, თორემ ფიზიკურად ვერ ვმუშაობთ, იმიტომ, რომ ძალიან ძველია ეს კომპიუტერი.

სახლიდან ვეზიდებით ამ ყველაფერს. მაგალითად, მე მუნიციპალიტეტიდან დავდივარ სოფელში და თუ გაკვეთილზე ქსეროქსი მჭირდება, წინასწარ უნდა დავგეგმო, დავაქსეროქსო. თუ დამავიწყდა რაღაცის ამობეჭდვა, იმას ნიშნავს, რომ დღევანდელი გეგმები ხვალისთვის უნდა გადავდო, რადგან სკოლის ბაზაზე არ არსებობს ქსეროქსი. ძალიან ვფერხდებით.

ვგეგმავთ ციფრული ოთახის მოწყობას, რომლისთვისაც სივრცე გვაქვს სკოლაში და დაახლოებით 4 000 ლარის შეგროვება გვჭირდება. ამ თანხის შეგროვების შემდეგ ჩვენ შევძლებთ კომპიუტერების, პრინტერისა და პროექტორის შეძენას.

„ორბელიანი მეტზე“ მასწავლებლებმა გავაგზავნეთ განაცხადი და გავიმარჯვეთ. უკვე სამი დღეა ჩაეშვა ჩვენი იდეა პლატფორმაზე და თანხის შეგროვება დაიწყება“, – გვიყვება სოფო.

მისი თქმით, ახლა მოსწავლეები ყოველდღიურ მოლოდინში არიან, როდის ექნებათ სკოლაში „ციფრული ოთახი“.

მასწავლებელი იმედოვნებს, რომ სკოლისთვის საჭირო ტექნიკის შეძენის შემდეგ მოსწავლეები უფრო ხალისიანად ჩაერთვებიან საგაკვეთილო პროცესში და ფორმალური და არაფორმალური განათლების მიღებას მრავალფეროვან სივრცეში გააგრძელებენ.

„მოლოდინზე ბევრი შემიძლია ვისაუბრო, იმიტომ, რომ ამ პაწაწუნა მოსწავლეებს მართლა არასდროს არაფერი არ ჰქონიათ და ემოციით ელოდებიან, როდის მოხდება ეს, ინფორმაციის მოძიებას სკოლის ბაზაზე დაიწყებენ და არ მოუწევთ სახლში სირბილი“.

პედაგოგის თქმით, სკოლაში ძალიან ცუდად მუშაობს ინტერნეტი, ფაქტობრივად, საერთოდ ვერ იყენებენ, რის მოგვარებაშიც სკოლის დირექტორის დახმარების იმედი აქვთ.

ტბეთის სკოლაში მალე მუსიკის ოთახის მოწყობასაც აპირებენ, ერთ-ერთი პროექტის დახმარებით.

________________________

მთავარ ფოტოზე: სოფო თავართქილაძე მოსწავლეებთან ერთად

გადაბეჭდვის წესი


ასევე: