მთავარი,სიახლეები

ტაქსი უნდა ავიყვანო, რომ ბავშვი სკოლაში გავუშვა – მახინჯაურში მოსახლეობა ტრანსპორტს ითხოვს

14.04.2023 •
ტაქსი უნდა ავიყვანო, რომ ბავშვი სკოლაში გავუშვა – მახინჯაურში მოსახლეობა ტრანსპორტს ითხოვს

მახინჯაურში, ე.წ. აბანოებთან და მის მიმდებარედ მცხოვრები მოსახლეობა, საზოგადოებრივი ტრანსპორტის დანიშვნას ითხოვს. მოქალაქეების თქმით, ბოლო სამი წელია მათ დასახლებაში ტრანსპორტი არ მოძრაობს, რის გამოც სახლში მისასვლელად ან მახინჯაურის ცენტრში ჩასასვლელად რამდენიმე კილომეტრის ფეხით გავლა უწევთ. უტრანსპორტობა განსაკუთრებულ პრობლემას უქმნის სკოლის მოსწავლეებსაც.

ლია სურმანიძეც ამ უბანში ცხოვრობს. მისი თქმით, იმის გამო, რომ ტრანსპორტი არ მოძრაობს, წვიმის დროს შვილს სკოლაში კი ვერ უშვებს.

„მე, მაგალითად, ტრანსპორტი არ მყავს და იძულებული ვარ, დილით ტაქსი გამოვიძახო. ტაქსის თანხაც ყოველდღიურად არ არის და მიწევს, ბავშვი სახლში დავტოვო და ისე მოვამზადო“, – გვითხრა მან.

წვიმიან ამინდში ბავშვები ფეხით თუ წავლენ სკოლაში,  სველდებიან და მთელი დღე ასეთ მდგომარეობაში უწევთ სკოლაში ყოფნა.

„არადა, თუ ბავშვი სკოლაში არ წავა, თავისთავად კარგი მომავალი არ ექნება და კარგი თაობა არ გვეყოლება ხომ? “ – გვეუბნება ლია.

ამავე პრობლემაზე საუბრობს ნაზიბროლა სურმანიძეც, რომელიც ასევე ამ უბანში ცხოვრობს.

„აქ საკმაოდ დიდი დასახლებაა, მარტო ერთ კორპუსში 70 ოჯახი ცხოვრობს. სხვა კორპუსებიც დგას და არის კერძო დასახლებებიც.

ადრე მოძრაობდა 21 ნომერი მიკროავტობუსი. მართალია, ისიც იშვიათად დადიოდა, მაგრამ შემდეგ საერთოდ მოგვიხსნეს და მთელი უბანი დაგვტოვეს ტრანსპორტის გარეშე.

დავწერეთ მერიაში განცხადება, რომ ავტობუსი მაინც დაინიშნოს. გვპირდებიან, მაგრამ გადის წლები და არაფერი იცვლება“, – ამბობს ნაზიბროლა სურმანიძე.

მისი თქმით, ავტობანის მშენებლობის გამო გზაც დაზიანდა და მიკროავტობუსებმა მიმართულება შეიცვალეს.

„ავტომანქანები შემოვლითი გზით დადიან და ჩვენი გზა დატოვეს ასე, მოუწესრიგებელი.

მერია გვპირდებოდა, რომ პირველი მარტისთვის დანიშნავდა ტრანსპორტს, მერე თქვეს პირველი აპრილიო და ახლაც უტრანსპორტოდ ვართ“, – გვეუბნება ნაზიბროლა სურმანიძე.

„ბათუმელები“ ხელვაჩაურის მერიას დაუკავშირდა და ჰკითხა, იციან თუ არა მოსახლეობის პრობლემის შესახებ და როდის დაინიშნება საზოგადოებრივი ტრანსპორტი მახინჯაურში.

მერიაში გვიპასუხეს, რომ ამ საკითხზე მუშაობენ და „მალე აღდგება, დაინიშნება ტრანსპორტი“.

თუმცა კონკრეტულ თარიღს ხელვაჩაურის მერიაში ისევ არ ასახელებენ.

________________

მთავარი ფოტო: „ბათუმელების“ არქივი

გადაბეჭდვის წესი


ასევე: