2024 წლის თებერვალში ხულოსთვის 2, შუახევსა და ქედისთვის კი თითო ახალი EURO 5-ი სტანდარტის შესაბამისი ავტობუსები შეისყიდეს, თუმცა ახალი ავტობუსები ხუთი თვის შემდეგაც არ ემსახურება ადგილობრივებს.
„ბათუმელები“ დაინტერესდა, რატომ არის ახალი ავტობუსები გაჩერებული.
„ამ ეტაპზე მიმდინარეობს ტარიფზე მსჯელობა, რის შემდეგაც საკითხი მარშრუტის და ტარიფის დასამტკიცებლად გავა საკრებულოს სხდომაზე.
მუნიციპალური საზოგადოებრივი ტრანსპორტი, უახლოეს პერიოდში, როცა შესაბამისი პროცედურული მხარე მოწესრიგდება ქედა-ბათუმი-ქედა სამარშრუტო ხაზზე იმოძრავებს და მოემსახურება ქედის მუნიციპალიტეტის მოსახლეობას“, – ასე მოგვწერეს ჩვენ შეკითხვებზე ქედის მუნიციპალიტეტის პრესსამსახურიდან.
„მძღოლების გადამზადება და ავტობუსში გადახდის ახალი სისტემის დამონტაჟება მიმდინარეობს“, – გვითხრეს შუახევის მუნიციპალიტეტის პრესსამსახურში. აქ ამბობენ, რომ ავტობუსი შუახევში მოსახლეობას დაახლოებით 15-20 ივლისიდან მოემსახურება.
ხულოს მერიამ მთელი დღის განმავლობაში არ უპასუხა „ბათუმელებს“ შეკითხვაზე, რატომ არ მოძრაობენ ახალი ავტობუსები ხულოში, დღის ბოლოს კი ფეისბუქზე პოსტი გამოაქვეყნა, რომ სამგზავრო ავტობუსები ხულო-ბათუმის მიმართულებით 11 ივლისიდან იმოძრავებენ და მგზავრობის ფასი 6 ლარი იქნება.
ახალი ავტობუსები 47 მგზავრზეა გათვლილი და ადაპტირებულია შეზღუდული შესაძლებლობების მქონე პირთათვის.
პროექტი საქართველოს მთავრობის მხარდაჭერით და აჭარის ბიუჯეტიდან მიღებული კაპიტალური ტრანსფერის ფარგლებში დაფინანსდა – ამის შესახებ ინფორმაცია მუნიციპალიტეტების მერიებმა გაავრცელეს.
_____________
ფოტოზე: ახალი ავტობუსი
