განათლების სამინისტროს ერთ-ერთი უწყება, განათლების მართვის საინფორმაციო სისტემა, საჯარო ინფორმაციის გაცემის წესს არღვევს.
„ბათუმელებმა“ უწყებისგან კონკრეტული ინფორმაცია 2023 წლის 6 თებერვალს გამოითხოვა, თუმცა, მიუხედავად იმისა, რომ კანონით განსაზღვრული ათდღიანი ვადა გავიდა, სამინისტროს დაქვემდებარებული უწყება კანონს არღვევს და არ გასცემს საჯარო ინფორმაციას.
ამ უწყების ფუნქცია საგანმანათლებლო სტატისტიკის წარმოება და გავრცელებაა.
სწორედ ამ უწყებამ უნდა უზრუნველყოს ინფორმაციულ-საკომუნიკაციო ტექნოლოგიების განვითარება და სასწავლო პროცესში ამ ტექნოლოგიების უზრუნველყოფა.
ინფორმაცია, რომელსაც „ბათუმელები“ ითხოვს, უწყებას ისედაც უნდა ჰქონდეს ელექტრონულ სისტემაში უკვე აღრიცხული და დამუშავებული.
მათ მხოლოდ ღილაკზე თითის დაჭერა სჭირდებათ, რომ აღნიშნული მონაცემები გაასაჯაროონ კანონით დადგენილი წესით.
ამის მიუხედავად, განათლების მართვის საინფორმაციო სისტემაში გვეუბნებიან, რომ ორი თვის განმავლობაში ვერ მოახერხეს არცთუ ისე დიდი მოცულობის საჯარო ინფორმაციის დამუშავება და მოწოდება. მათ არც იმაზე აქვთ პასუხი, როდის შეძლებენ გამოთხოვილი ინფორმაციის გაცემას.
განათლების მართვის საინფორმაციო სისტემის (Emis) ბიუჯეტი 2020 წელს ათი მილიონზე მეტი ლარი იყო. ბოლო წლების ბიუჯეტი უწყებას თავის ვებგვერდზე განთავსებული არ აქვს.
2023 წელს [იანვრიდან დღემდე] „ბათუმელებმა“ საჯარო ინფორმაცია სხვადასხვა უწყებიდან 27-ჯერ გამოითხოვა. აქედან პასუხი მივიღეთ 10 წერილზე.
ინფორმაციის მოწოდებაზე უარი გვითხრეს 11 შემთხვევაში, 1 შემთხვევაში პასუხი ნაწილობრივ [არასრულად] მოგვაწოდეს, ხოლო 4 შემთხვევაში დღემდე არანაირი პასუხი არ მიგვიღია, მათ შორისაა განათლების მართვის საინფორმაციო სისტემაც.
