მთავარი,სიახლეები

მეწყერი ბუთურაულში – საფრთხეში მყოფი სოფელი დახმარებას ითხოვს

20.03.2023 • 1394
მეწყერი ბუთურაულში – საფრთხეში მყოფი სოფელი დახმარებას ითხოვს

შუახევის მუნიციპალიტეტის სოფელ ბუთურაულში 14 მარტს მეწყრული პროცესები გააქტიურდა.

ადგილობრივების თქმით, მეწყრული პროცესები სოფელში დიდი ხნის წინ დაიწყო, თუმცა მდგომარეობა ბოლო დღეებში განსაკუთრებით რთულია.

ჩავარდა სოფლის ცენტრალური გზის ერთი ნაწილი და იზოლაციაში მოექცა გზის იქით უბანში მცხოვრები მოსახლეობა. ამ უბნიდან სკოლაში ვეღარ დადიან მოსწავლეები და ბაღის აღსაზრდელები. უბნამდე ვერ მიდის სასწრაფო დახმარების მანქანაც.

მეგი დიასამიძის ოჯახი ბუთურაულში ცხოვრობს, მეგი კი თბილისში სწავლობს.

მისი თქმით, რეალობა იმაზე ბევრად საშიშია, რაც ფოტოებსა თუ ვიდეოებზე ჩანს.

„14 მარტიდან ერთი კვირის შუალედში სერიოზული საფრთხეები შეიქმნა.

მე თბილისში ვიყავი და სწორედ ამ მიზეზით გადავწყვიტე ჩამოსვლა, რადგან ამ საზოგადოების ნაწილი ვარ და პასუხისმგებლობას ვგრძნობ, როგორც მოქალაქე.

დაზიანებული სავალი გზის ნაწილის ზემოთ ცხოვრობს და ჩაკეტილია 18-20 ოჯახი. მათი ძირითადი მოთხოვნაა უსაფრთხო გარემოს შექმნა, რაც ამ სოფლიდან გასახლებას ითვალისწინებს, იმიტომ, რომ აქ ცხოვრება უკვე ფიზიკურად შეუძლებელია. ნებისმიერ წუთს ელოდებიან ძვრებს და უფრო მეტ საფრთხეს. უნდა ითქვას ისიც, რომ საფრთხე ემუქრება სოფლის ქვედა და სხვა ნაწილებსაც“, – ამბობს მეგი.

შუახევი, სოფელი ბუთურაული. ფოტო/მეგი დიასამიძე

მეგიმ გვითხრა, რომ დღეს, 20 მარტს, მთელი დღის განმავლობაში გარეთ იყვნენ ოჯახები.

„ყველა იმას ამბობს, რომ ღამით ძილი დაკარგეს, იმიტომ, რომ ყოველდღიურად ელოდებიან, რაღაც მოხდება.

შესამჩნევია ისიც, რომ ემოციურად დაიღალა ხალხი. ალბათ ამიტომაცაა, რომ თავდაპირველად თუ ამბობდნენ – პირუტყვი გვყავს ყველას, ხომ არ დავტოვებთ და წავალთო, ახლა ამაზე ვეღარ კონცენტრირდებიან და ამბობენ, უსაფრთხო გარემო შეგვიქმენით და დანარჩენზე ჩვენ ვიზრუნებთო,“ – უთხრა მეგიმ „ბათუმელებს“.

მეგის თქმით, შუახევის მერის წარმომადგენელი ადგილობრივ მოსახლეობას რამდენჯერმე შეხვდა. მერიის წინადადებაა, რომ „ლოგიკურად და ეტაპობრივად უნდა მოხდეს ყველაფერი“, გეოლოგებმა შეამოწმონ ადგილი და დასკვნის მომზადების შემდეგ განიხილონ, თუ რა და როგორ მოხდება.

„საქმე იმაშია, რომ მეწყრულ კერებზე ცვლილებებია და ახალი მოცემულობები როცა იქმნება, თავიდანაა შესასწავლი, ახალი დასკვნაა დასადები… რაღაც მომენტში მოსახლეობას ნდობა შეუმცირდა, რადგან ეს პროცესები ძალიან იწელება დროში, მეწყრულ კერებზე კი ყოველდღე ვამჩნევთ ცვლილებებს.

მოსახლეობას უნდა უსაფრთხო გარემოში გადასვლა. მერიიდან გვეუბნებიან, ეტაპობრივად უნდა მივყვეთ ყველაფერსო. რა თქმა უნდა, ესეც ლოგიკურია, რომ გეოლოგების მიერ [ადგილის] შესწავლის გარეშე არაფერი არ მოხდება, მაგრამ დროის ფაქტორია გასათვალისწინებელი. შედარებით სწრაფი რეაგირებაა საჭირო, იმდენად დიდ საფრთხეშია უბანიც და სოფელიც“, – ამბობს მეგი.

შუახევი, სოფელი ბუთურაული. ფოტო/მეგი დიასამიძე

მეგი გვეუბნება იმასაც, რომ უბანში, სადაც ყველაზე კრიტიკული მდგომარეობაა შექმნილი, ახლა ძირითადად მოხუცები ცხოვრობენ:

„რადგან მეწყრული ცვლილებები მარტივი შესამჩნევია და მერიისგან სწრაფი რეაგირება არ ხდება, ბევრმა გადაწყვიტა მოხუცები გაეყვანა, თუმცა ოჯახებით ვერ მიდიან. ფიზიკურად არ აქვთ წასასვლელი და ბუნებრივია, ასე უცებ ვერ წავლენ, ვერ გადასახლდებიან. ამიტომაა მათი პირველი მოთხოვნა უსაფრთხო საცხოვრებელი“.

მეგის ძმა უკვე ერთი კვირაა, რაც ბაღში ვერ დადის. „ბავშვებს მარტო ვერ გაუშვებენ სკოლაში, რადგან შეიძლება გზის სავალ ნაწილზე ჩავარდნენ“ – გვითხრა მან.

მეგი ფიქრობს, რომ მნიშვნელოვანია, ამ თემაზე ყველამ დროულად ისაუბროს, რადგან გეოლოგიური დასკვნები არ სჭირდება იმ სიტუაციის შეფასებას, რაც ახლა ბუთურაულშია და ძალიან ცხადად ჩანს.

შუახევი, სოფელი ბუთურაული. ფოტო/მეგი დიასამიძე

„ბათუმელები“ რამდენიმე დღის წინ ესაუბრა გეოლოგთა ჯგუფს, რომელიც აჭარის მაღალმთიანეთში კრიტიკულ ზონებს სწავლობდა.

მამუკა ფუტკარაძემ, აჭარის გარემოსდაცვისა და ბუნებრივი რესურსების სამმართველოს გეოლოგიური სამსახურის უფროსმა მაშინ გვითხრა, რომ ოჯახების სიცოცხლის უზრუნველსაყოფად მნიშვნელოვანია იმ ზონებიდან, სადაც გააქტიურებულია მეწყრული პროცესები, გეოლოგიური დასკვნის თუ რეკომენდაციების მომზადებამდე, მოსახლეობის უსაფრთხო საცხოვრებელ გარემოში გადაყვანა.

„ბათუმელები“ დაუკავშირდა შუახევის მუნიციპალიტეტის მერის მოადგილეს და მერის წარმომადგენელს სოფელ ბუთურაულში. მათგან ზეპირი კომენტარი ვერ მივიღეთ, თუმცა მუნიციპალიტეტის პრესსამსახურმა ამ თემასთან დაკავშირებით წერილობით მოგვწერა:

„შუახევში ბოლო დროს მოსული უხვი ნალექის შედეგად სხვადასხვა სოფელში და ასევე, სოფელ ბუთურაულში, მეწყრული პროცესები განვითარდა. დამეწყრილი ტერიტორია გეოლოგიური სამსახურის მიერ იქნა შესწავლილი, გაკეთდა პირველადი შეფასებები.

ადგილობრივი მოსახლეობა დამეწყრილი ადგილების ხელმეორედ შესწავლას მოითხოვს.

მერიის მხრიდან მოწვეული იქნა დამატებით გეოლოგების ჯგუფი და ხვალიდან დაიწყება დამეწყრილი ადგილების დეტალური შესწავლა. გეოლოგიური დასკვნის მიხედვით გატარდება შესაბამისი ღონისძიებები“.

გადაბეჭდვის წესი


ასევე: