ბათუმი,მთავარი,სიახლეები

პლაჟის ზღვაში ჩაზვავების რისკი მაღალია – ბათუმის კონცხთან წყალქვეშა ფერდობს შეისწავლიან

19.03.2023 • 14488
პლაჟის ზღვაში ჩაზვავების რისკი მაღალია – ბათუმის კონცხთან წყალქვეშა ფერდობს შეისწავლიან

„[ინერტული] მასალის მუდმივი დაგროვება იახტკლუბთან აუცილებლად გამოიწვევს პლაჟის მოწყვეტას და ჩაზვავებას კანიონში. როდის მოხდება ეს პროცესი და ექნება თუ არა მას კატასტროფული ხასიათი დამოკიდებულია ბევრ შემთხვევით პროცესზე და მისი ზუსტი დრო უცნობია“, – აღნიშნულია პროექტში, რომლის მიხედვითაც ბათუმში ზღვის ხელოვნური კვებაა დაწყებული.

აჭარის გარემოს დაცვისა და ბუნებრივი რესურსების სამმართველო ტენდერის გარეშე „ბათუმის კონცხის წყალქვეშა ფერდობის შესწავლის, ჭარბი აკუმულაციის უბნების გამოვლენის და მოსალოდნელი რისკების შემცირების მიზნით, სათანადო კვლევის ჩატარებისა და საპროექტო-სახარჯთაღრიცხვო დოკუმენტაციის“ შესყიდვას გეგმავს.

აღნიშნულ კვლევასა და დოკუმენტაციაში სამმართველო 41 700 ლარის გადახდას აპირებს [ხოლო მიწოდების ვადად ხელშეკრულების გაფორმებიდან 35 დღე აქვს მითითებული]. ამ კვლევაზე იქნება დამოკიდებული, თუ რა ღონისძიებების გატარება იქნება საჭირო ბათუმის კონცხთან არსებული საფრთხის შესამცირებლად.

სამმართველომ, შესაბამისი ნებართვის მისაღებად, შესყიდვების სააგენტოს 2023 წლის 17 მარტს მიმართა; განხილვის თარიღად 22 მარტია მითითებული.

„როდესაც მასალის დაგროვება აღწევს გარკვეულ კრიტიკულ ზღვარს, საკმარისია ერთი ძლიერი შტორმი ან მცირე სიმძლავრის მიწისძვრა, რათა მოხდეს პლაჟის მნიშველოვანი ტერიტორიის მოწყვეტა და ჩაზვავება 50 მეტრზე მეტ სიღრმეზე, როგორც მოხდა 1999 წლის იანვარში“, – აღნიშნულია იმავე პროექტში, რომლის საფუძველზეც ზღვაში ხრეში შეაქვთ:

რა ხდება ბათუმის სანაპიროზე, რომელსაც ხელოვნურად კვებავენ | ფოტო

ბათუმის კონცხთან 1999 წლის 14 იანვარს, ნაპირს მოწყდა და მყისიერად დაიკარგა ზღვაში დაახლოებით 200 მეტრი სიგრძის და 60 მეტრამდე სიგანის პლაჟი [დაახლოებით 1,2 ჰექტარი].

კონცხთან არსებული საფრთხე ერთ-ერთია იმ პრობლემებიდან, რაც ქალაქის სანაპირო ზოლშია წარმოქმნილი.

ბათუმის პლაჟის შესანარჩუნებლად და სანაპირო ზოლის დასაცავად კი, ზღვის ხელოვნური კვება ყოველწლიურად არის აუცილებელი.

მეტიც, სპეციალისტების დასკვნით, „ახლო მომავალში აუცილებლად უნდა შემუშავდეს [ბათუმის] სანაპიროს ექსპლოატაციის და ზღვისგან დაცვის ახალი სტრატეგია. წინააღმდეგ შემთხვევაში კატასტროფული მოვლენები გარდაუვალია, ვინაიდან ამოწურულია ზღვის სანაპიროს ბუნებრივი დინამიკის აღდგენის ყველა შესაძლებლობა“.

დოკუმენტებში ასევე აღნიშნულია, რომ:

  • „1999 წლის იანვრიდან დღემდე, იახტკლუბთან მუდმივად ხდება მასალის დაგროვება და წინ წაწევა.
  • 2007-2009 წლებში, ნაპირის ხაზი, ორ დეზს შორის, შესაბამისად 54-40 მეტრზე იყო უკან დახეული 2015 წელთან შედარებით.
  • მთელი ამ პერიოდის განმავლობაში იახტკლუბთან ხდებოდა მასალის დაგროვება და ნაპირის წინ წაწევა, საშუალოდ 2 მ/წელიწადში სიჩქარით.
  • ნაპირის ბუნებრივი ფლუქტუაცია ბათუმის კონცხზე, საფრთხეს უქმნის ნებისმიერ ნაგებობას, რომელიც პლაჟზე არის განლაგებული.“

ამ თემაზე ვრცლად:

პლაჟის მოწყვეტის და ზღვაში ჩაზვავების რისკი მაღალია – რა ხდება ბათუმის კონცხზე

 

გადაბეჭდვის წესი


ასევე: