რუსი პროპაგანდისტი, RT-ის მთავარი რედაქტორი, მარგარიტა სიმონიანი წერს, რომ 2008 წლის აგვისტოს განმეორების შემთხვევაში „საქართველოს არავინ გადაუსვამს თავზე ხელს და უბრალოდ, პირდაპირ დაარტყამენ თბილისს“.
ამის შესახებ სიმონიანი ტელეგრამზე წერს. იგი საქართველოში რუსული კანონის და მთავრობის პრორუსული კურსის წინააღმდეგ გამართულ აქციებს ეხმიანება და წერს, რომ „თავიდანვე ცხადი იყო“, რომ ეს მათთვის „მეორე ფრონტის გასახსნელად“ იყო საჭირო.
იგი ასევე წერს, რომ თბილისში მომიტინგეები სკანდირებენ: „სოხუმი, სოხუმი!“
„…არავინაა, ვინც მათ ეტყვის, რომ 2008 წლის აგვისტოს განმეორების შემთხვევაში, საქართველოს თავზე ხელს არავინ გადაუსვამს და არც ჯარს გაგზავნის იქ, უბრალოდ პირდაპირ დაარტყამენ თბილისს, თუნდაც იმიტომ, რომ ა). ახლა სენტიმენტების დრო არ არის; ბ). თბილისში არ არის კიევ-პეჩორის ლავრა; გ). ჩვენთან არასდროს არავინ არ თვლიდა და არ თვლის თავს ერთ ხალხად ქართველებთან, ხოლო რუსეთის ფედერაცია არასოდეს ყოფილა „თბილისის რუსეთი“ – წერს სიმონიანი.
გუშინ, 9 მარტს, თბილისსა და ბათუმში მიმდინარე საპროტესტო აქციების ფონზე, რომელზეც მოქალაქეები რუსულ კანონს და ხელისუფლების პრორუსულ კურსს აპროტესტებდნენ, რუსეთის ეკონომიკური განვითარების სამინისტრომ რუსეთის მოქალაქეებს მოუწოდა, თავი შეიკავონ საქართველოში მოგზაურობისგან.
ამავე თემაზე:
რუსეთი თავის მოქალაქეებს მოუწოდებს, თავი შეიკავონ საქართველოში მოგზაურობისგან
