მთავარი,სიახლეები

შალვა პაპუაშვილი: მანდატურების მიმართ იყო ძალადობა

07.03.2023 • 648
შალვა პაპუაშვილი: მანდატურების მიმართ იყო ძალადობა

„უნდა მოგიწოდოთ, დაემორჩილოთ, მე სახელებს არ დავასახელებ, მაგრამ ამ შემთხვევაში იყო მანდატურების მიმართ ძალადობა, ეს არის კადრებში აღწერილი,“ – აღნიშნა ბიუროს სხდომაზე პარლამენტის თავმჯდომარე შალვა პაპუაშვილმა.

დღეს, 7 მარტს, პარლამენტის ბიურო ერთ-ერთ საკითხად განიხილავს რუსული კანონის პლენარულ სხდომაზე გატანას. პარლამენტში იმ სართულზე, სადაც ბიუროს სხდომა მიმდინარეობს, მედიის წარმომადგენლებს არ უშვებენ. ბიურომდე მისასვლელი კიბეები სახელმწიფო დაცვის სამსახურის წარმომადგენლებს აქვთ გადაკეტილი. არ უშვებენ ოპოზიციონერ დეპუტატებსაც.

შალვა პაპუაშვილის განმარტებით, პარლამენტის შენობაში არის არა სუსი, არამედ არიან პარლამენტის მანდატურები და სახელმწიფო სპეციალური დაცვის სამსახური. პარლამენტის თავმჯდომარემ მადლობა გადაუხადა მანდატურის სამსახურს.

„მადლობა მინდა გადავუხადო ჩვენი მანდატურის სამსახურს… პატივი ვცეთ ჩვენი მანდატურის სამსახურს, დავემორჩილოთ მათ მითითებებს, რთული სამსახურია, რა თქმა უნდა.

რაც შეეხება უსაფრთხოების რეჟიმს, თქვენ როგორც იცით, საქართველოს პარლამენტის სასახლეს იცავს მანდატურის სამსხური და  სახელმწიფო სპეციალური დაცვის სამსახური, ისევე, როგორც სხვა ადმინისტრაციულ შენობებს. მინდა მათაც მადლობა გადავუხადო, ვინაიდან ვხედავთ, რომ უზრუნველყვეს სრულიად ყოფილიყო სიმშვიდე, სამუშაო გარემო და რაც მთავრია, უსაფრთხოება უზრუნველყოფილი პარლამენტის აპარატის თანამშრომლების და პარლამენტის წევრების,“ – თქვა შალვა პაპუაშვილმა.

პარლამენტის თავმჯდომარეს ბიუროს სხდომაზევე უპასუხა ანა ნაცვლიშვილმა.

„ამ პატივისცემას პრაქტიკული გამოხატულება სჭირდება; მათ ბრძანებებს არ უნდა აძლევდეთ და არ უნდა ეუბნებოდეთ, რომ სამსახურს დაგატოვებინებთ, თუ ოპოზიციონერებს არ გააძევებთ აქედანო. ამათ წნეხავთ თქვენ და ამით ხართ ყოჩაღები სხვა ადამიანების ხარჯზე,“ – თქვა ანა ნაცვლიშვილმა.

2 მარტს პარლამენტის სხდომათა დარბაზში, მანდატურის სამსახურის თანამშრომლებმა შესვლის საშუალება არ მისცეს ოპოზიციონერ დეპუტატებს, ისინი ჩაკეტილ კართან იდგნენ და პარლამენტარებს იმ დარბაზში არ უშვებდნენ, სადაც კომიტეტების სხდომაზე რუსულ კანონპროექტს განიხილავდნენ.

გადაბეჭდვის წესი


ასევე: