დღეს, 24 თებერვალს, რუსეთის მიერ უკრაინაში ფართომასშტაბიანი ომის დაწყებიდან ერთი წლისთავზე, მსოფლიო კიდევ ერთხელ გმობს რუსულ აგრესიას და ომს უკრაინაში. თბილისში, საქართველოს პრეზიდენტის სასახლეში, ომის წინააღმდეგ და უკრაინის მხარდასაჭერი განცხადებები გაკეთდა.
უკრაინის მხარდასაჭერ ცერემონიაზე პრეზიდენტის სასახლეში იმყოფებოდნენ მეგობარი ქვეყნების ელჩები და საქართველოს პარლამენტის თავმჯდომარე შალვა პაპუაშვილი.
სიტყვით გამოსვლისას უკრაინის ელჩის მოვალეობის შემსრულებელმა, ანდრეი კასიანოვმა, მადლობა გადაუხადა ქართველ ხალხს ომში მყოფი უკრაინელი ხალხის მორალური და ჰუმანიტარული თანადგომისთვის. განსაკუთრებული მადლობა კი გადაუხადა ქართველ მასწავლებელს, ლადო აფხაზავას, რომელმაც უკრაინელების დასახმარებლად, ჰუმანიტარული აქციის ფარგლებში, სოლიდური თანხა შეაგროვა.
„ლადო აფხაზავამ, რომელიც არის მასწავლებელი გურიიდან, შეძლო 700 000-მდე ევროს შეგროვება, რათა ჰუმანიტარული დახმარება მიეწოდებინა უკრაინელი ხალხისთვის.
უკრაინელი ბავშვები გაიხსენებენ და ემახსოვრებათ მათი ცხოვრების ბოლომდე ეს დახმარება, რაც ქართველმა ხალხმა მიაწოდა მათ ომის დღეებში“, – განაცხადა ელჩის მოვალეობის შემსრულებელმა.
მისი თქმით, საქართველომ და უკრაინამ ერთად უნდა იბრძოლონ საერთო მტრის – რუსეთის წინააღმდეგ.
„ჩვენი და თქვენი მტერი არის საერთო, ჩვენ ორივეს ერთი ოკუპანტი გვყავს, რომელიც არ ჩერდება და უტევს ჩვენ ქვეყნებს. ქართველი ჯარისკაცები უკრაინელების გვერდიგვერდ დგანან და აქტიურად იცავენ ქვეყანას“ – განაცხადა ანდრეი კასიანოვმა.
__________________
ამ თემაზე:
უკარაინის დასახმარებლად ლადო აფხაზავამ 700 000 დოლარი შეაგროვა
