რუსეთის უკრაინაში შეჭრის ერთი წლისთავთან დაკავშირებით საქართველოს პრეზიდენტის, სალომე ზურაბიშვილის ორბელიანის რეზიდენციაში გაიმართა უკრაინისადმი სოლიდარობის ღონისძიება. რეზიდენციაში სტუმრებს შორის იყვნენ უცხო ქვეყნის ელჩები და საქართველოს პარლამენტის თავმჯდომარე, შალვა პაპუაშვილი.
დღეს პრეზიდენტმა ზურაბიშვილმა კიდევ ერთხელ გამოუცხადა სოლიდარობა უკრაინას და მწუხარება გამოხატა საქართველოს მთავრობის ქცევაზე.
„ამ მოცემულობაში არ შემიძლია არ გამოვხატო მწუხარება იმის გამო, რომ საქართველოს მთავრობამ იზოლაციაში მოაქცია თავისი თავი, გამოეყო დემოკრატიულ თანამეგობრობას და რაღაც გაუგებარი მიზეზებით ცდილობს გაამართლოს ვითომ ნეიტრალური თუ დაბალანსებული პოზიცია.
გაუგებარია იმ ქვეყნისგან, რომელმაც გაიარა იგივე განსაცდელი არაერთხელ და რომელმაც კარგად იცის, რას ნიშნავს მტრის მიერ სუვერენობის შელახვა და დამოუკიდებლობის წინააღმდეგ აღმართული მახვილი. რომელსაც ყველაზე კარგად ესმის ოკუპაციის სიმწარე.
საბედნიეროდ, საქართველოს საზოგადოებამ ძალიან მკაფიოდ გამოხატა თავისი პოზიცია, ყველა ფორმა და საშუალება გამოიყენა, რათა საუკუნოვანი მეგობრისთვის სრული სოლიდარობა დაემტკიცებინა. თბილისის ქუჩებმა არაერთხელ გვაჩვენა, სად დგას ქართველი ხალხი“, – თქვა სალომე ზურაბიშვილმა.
მისი თქმით, მან ვერ მიიღო უკრაინისგან მიწვევა, მაგრამ წუხს იმის გამო, რომ პარლამენტმა არ გაუშვა დელეგაცია კიევში მიწვევის მიუხედავად.
„საქართველოს მთავრობა დღეს კიევში უნდა ყოფილიყო, თუმცა, როგორც ამ ქვეყნის პრეზიდენტმა, ამ საზოგადოების სახელით, ყველა ფორმატში გამოვხატე საქართველოს უდრეკი მხარდაჭერა და ასეც გავაგრძელებ.
მიმაჩნია, რომ საქართველოს მთავრობა თუ არა, საქართველოს პრეზიდენტი უნდა ყოფილიყო უთუოდ დღეს კიევში. ამისთვის მზადყოფნა დროულად გამოვხატე, თუმცა, სამწუხაროდ, მოწვევა ვერ მივიღე. სამაგიეროდ, პარლამენტმა მოწვევის მიუხედავად არ მიიჩნია ოფიციალური დელეგაციის გაგზავნის საჭიროება. ვწუხვარ, რომ ჩვენ მხოლოდ ოპოზიციის სახით ვართ წარმოდგენილი დღეს კიევში, თუმცა მაინც მიხარია, რომ ისინი იქ იმყოფებიან“, – თქვა ზურაბიშვილმა.
