აჭარაში „უშვილობის დიაგნოსტიკისა და მკურნალობის“ პროგრამის ბიუჯეტი 200 ათასი ლარით გაიზარდა

აჭარაში “უშვილობის დიაგნოსტიკისა და მკურნალობის” პროგრამის ბიუჯეტი 200 ათასი ლარით გაიზარდა და მიმდინარე წლიდან 700 000 ლარს შეადგენს. პროგრამა აჭარის ჯანდაცვის სამინისტრომ გასულ წელს, პილოტურ რეჟიმში აამუშავა. სამინისტროს ცნობით, უშვილო წყვილების სამედიცინო მომსახურება ფინანსდება 80%, 90% და 100%-ით; დასაფინანსებლად ბენეფიციართა სარეიტინგო ქულა პროგრამის ამოქმედებისას 200 ათასი იყო, ახლა 300 ათასია. პროგრამით სარგებლობენ აჭარის ტერიტორიაზე რეგისტრირებული 300 000-მდე სარეიტინგო ქულის მქონე, სოციალურად დაუცველი და შეზღუდული შესაძლებლობის სტატუსის მქონე, არანაკლებ ერთი წლის განმავლობაში კანონიერ ქორწინებაში მყოფი უშვილო წყვილები, რომელთაც აჭირდებათ შესაბამისი რეპროდუქციული სამედიცინო დახმარება. უშვილობის დიაგნოსტირებისა და მკურნალობის საშუალო საბაზრო ფასი დღეს დაახლოებით 10 000 ლარია. ამ სერვისს საქართველოში არც ერთი სადაზღვევო პაკეტი არ ანაზღაურებს. სამინისტროს ცნობით, გასულ წელს პროგრამის ფარგლებში გაიცა 89 ვაუჩერი.

გასწორება: სიახლის სათაური თავდაპირველად იყო “აჭარაში უშვილობის მკურნალობის პროგრამით დაფინანსება 100%-მდე გაიზარდა”, თუმცა აჭარის ჯანდაცვის სამინისტრომ მოგვიანებით დააზუსტა, რომ პროგრამის ბენეფიციართა ნაწილისთვის მკურნალობის 100%-ით დაფინანსება აქამდეც იყო შესაძლებელი. ამავე თემაზე: