ბათუმის საკრებულოს წევრი რამაზ სურმანიძე საკრებულოს ტოვებს. მის განცხადებას, უფლებამოსილების ვადამდე შეწყვეტის შესახებ, საკრებულო ხვალ, 27 მაისს განიხილავს.
„ეს არის ჩემი პირადი სურვილი და იგი არანაირ პოლიტიკას არ უკავშირდება – უთხრა „ბათუმელებს“ რამაზ სურმანიძემ – ამჟამად 4 წიგნზე ერთდროულად ვმუშაობ და დრო საერთოდ არ მრჩება. მინდა, რომ სამეცნიერო საქმეს მივხედო.“
“მიიღეთ თუ არა შეთავაზება პოლიტიკური პარტიებისგან მომავალი საპარლამენტო არჩევნებისთვის?” – “ბათუმელების” ამ შეკითხვაზე რამაზ სურმანიძემ გვითხრა, რომ შეთავაზება ბევრი აქვს: “ასაკოვანი ვარ, მაგრამ ეტყობა, აწყობთ პოლიტიკურად პარტიულ სიაში ჩემი ყოფნა. გადაწყვეტილება ჯერ არ მიმიღია, გააჩნია, რა პირობებს შემომთავაზებენ, არ გამოვრიცხავ, ისევ დავბრუნდე პოლიტიკაში”.
რამაზ სურმანიძე ბათუმის საკრებულოს წევრი 2014 წელს გახდა პარტიიდან “ერთიანობის დარბაზი”. მას საკრებულოში სავარაუდოდ გოჩა ხიმშიაშვილი ჩაანაცვლებს. ის პარტიის საარჩევნო სიაში რიგით მეორე იყო. პარტიას „ერთიანობის დარბაზი” არჩევნების შემდეგ არანაირი აქტივობა აღარ ჰქონია.
რამაზ სურმანიძე ბათუმის საკრებულოში იყო ფრაქცია „ახალი ოპოზიციის“”, ასევე ჯანმრთელობისა და განათლების კომისიების წევრი.
