უკრაინის პრეზიდენტის აპარატის უფროსის მრჩეველმა მიხაილო პოდოლიაკმა კიდევ ერთხელ განაცხადა, რომ უკრაინა არ არის დაინტერესებული რუსეთის ტერიტორიების ოკუპაციით და უკრაინის შეტევა კურსკში აუცილებელია კრემლის დასარწმუნებლად დაიწყოს „გულწრფელი მოლაპარაკების პროცესი“.
„თუ ჩვენ ვსაუბრობთ პოტენციურ მოლაპარაკებებზე – ხაზს ვუსვამ, პოტენციურზე – მოგვიწევს რუსეთის ფედერაციის მაგიდის მოპირდაპირე მხარეს დასმა. ჩვენი პირობებით. ჩვენ აბსოლუტურად არ ვაპირებთ ხვეწნას: „გთხოვთ, მობრძანდეთ მოლაპარაკების მაგიდასთან“. ამის ნაცვლად ჩვენ გვაქვს იძულების შემოწმებული და ეფექტური საშუალებები.
გარდა ეკონომიკური და დიპლომატიური ინსტრუმენტისა, ეს ასევე სამხედრო ინსტრუმენტია. ჩვენ უნდა მივაყენოთ მნიშვნელოვანი ტაქტიკური მარცხი რუსეთს. კურსკის რეგიონში ჩვენ ცხადად ვხედავთ, თუ როგორ გამოიყენება სამხედრო ინსტრუმენტი ობიექტურად, რათა დაარწმუნოს რუსეთის ფედერაცია სამართლიანი მოლაპარაკებების პროცესში. კიდევ ერთხელ – მოლაპარაკების პროცესი და არა ტრადიციული რუსული პროპაგანდა და კაპიტულაციის შანტაჟი…
მნიშვნელოვან ინსტრუმენტს წარმოადგენს, ასევე, გავლენა რუსეთში საზოგადოებრივ აზრზე, რომელიც იწყებს ცვლილებას, როდესაც ომი მათ ტერიტორიაზე ღრმად შედის. ფაქტია, რომ ბოლო დრომდე აგრესორი ქვეყნის მოქალაქეები ძირითადად გულგრილები რჩებოდნენ საომარი მოქმედებების მიმართ, რადგან ეს უკრაინაში ხდებოდა.
ჩვენს დასავლელ მოკავშირეებს აქვთ გარკვეული ილუზია, რომ რუსებს შორის მიმდინარეობს დისკუსია ომის შესახებ. არა, ასეთი დისკუსიები არ არის, პოლიტიკური საკითხები იქ საერთოდ არ განიხილება. რუსები ომზე არ საუბრობდნენ და თავს საკმაოდ კომფორტულად გრძნობდნენ, რადგან მათგან შორს იყო სიკვდილი და ნგრევა.
როცა ომი მათ ტერიტორიაზე მოვიდა, რუსებს აშკარად შეეშინდათ. ისინი შოკში არიან. მიუხედავად იმისა, რომ კურსკის რეგიონში ბრძოლებს ტელევიზიით მოიხსენიებენ, როგორც „ცნობილ სიტუაციას საზღვართან ახლოს“, ოჯახებმა და მეგობრებმა დაიწყეს ჩურჩული ფრონტზე რეალურ ვითარებაზე““, – წერს პოდოლიაკი X-ზე [ყოფილი ტვიტერი].
