მოქალაქე ასლან სარიშვილის განცხადების შესწავლის მიზნით ბათუმის საკრებულო დროებითი სამუშაო კომისიის შექმნას აპირებს. გადაწყვეტილებას საკრებულო 27 მაისის სხდომაზე მიიღებს. ასლან სარიშვილმა საკრებულოს სხდომა მიმდინარე წლის 20 აპრილს ჩაშალა, როცა მან დარბაზში მყოფი მერისგან უშუალოდ მოითხოვა პასუხის მიღება მიყენებული ზარალის ანაზღაურებაზე.
„რადგან მოქალაქე ამბობს, რომ მას არასწორად ექცევიან, ჩვენ შევისწავლით ამ საკითხს. კომისიის წევრები იქნებიან საკრებულოს წევრები და ასევე იურისტები საკრებულოს აპარატიდან” – ამბობს “ბათუმელებთან” ირაკლი მიქელაძე, ბათუმის საკრებულოს ფრაქცია “ქართული ოცნების” თავმჯდომარე.
“25 დეპუტატი მეუბნება, მართალი ხარო და იმედია, ახლა არ გავმტყუნდები” – გვითხრა ასლან სარიშვილმა: „სახლი სტიქიამ 2014 წლის 31 მაისს დამიზიანა. მაშინ მერია ქირის ფულს სამი თვის განმავლობაში მიხდიდა. წინასაარჩევნო პერიოდი იყო, ერმაკოვი დამპირდა, რომ სრულად ამინაზღაურებდნენ ზარალს. სახლი მე თვითონ გავარემონტე და დაახლოებით 25 ათასი დამიჯდა. კომისიის შესწავლით, მხოლოდ 14 100 ლარი უნდა ამინაზღაურონ, მაგრამ ამასაც არ მაძლევენ”
საკრებულოს სხდომა, 20 აპრილი, ნათია ზოიძის ფოტო
