„ფული გადავიხადეთ, ბინა კი არ აშენდა, ვითხოვთ, ბათუმის მერთან შეხვედრას,“ – ამბობს მოქალაქე ნანა ბერიძე. ის იმ აქციის მონაწილეა, რომელიც დღეს, 31 იანვარს, ბათუმის მერიასთან გაიმართა.
აქციის მონაწილეების თქმით, ისინი სამშენებლო კომპანია „დიასმა“ დააზარალა, რომელსაც ორი საცხოვრებელი კორპუსი ჭავჭავაძის 113-ში უნდა აეშენებინა. კორპუსების მშენებლობა ვერ დასრულდა, დაზარალებულები კი იმ სამშენებლო კომპანიას ვეღარ უკავშირდებიან, ვისაც ფული გადაუხადეს.
„მე პირადად გადავიხადე 35 ათასი დოლარი 2012 წელს, 87 კვადრატული მეტრი ბინა ვიყიდე… ერთი კორპუსი, 6 სართული აშენდა, მეორე – 12, მაგრამ მხოლოდ ხარაჩოებია.
რამდენჯერმე ვცადე, მაგრამ ვეღარ ვუკავშირდები მესაკუთრეს. ბინა 2013 წელს უნდა ჩაგვბარებოდა,“- გვიყვება ნანა ბერიძე.
აქციის მონაწილეების აზრით, მსგავს სიტუაციაში მერია უნდა ჩაერთოს და სამშენებლო ობიექტი გასხვისდეს ისე, რომ ბინის მესაკუთრეების მოთხოვნა დაკმაყოფილდეს.
„ეს პრეცედენტი ხომ შექმნა კახი კალაძემ?“ – ამბობს აქციის მონაწილე ნანა ბერიძე და ყურადღებას ამახვილებს პრაქტიკაზე, როცა სამართალდამცველები აქტიურობის ნაცვლად არ რეაგირებენ და საკუთრების საკითხიც კი პოლიტიზებულად იქცა.
„აღმოჩნდა, რომ ფონდი იმ კომპანიას 100 ლარად შეუქმნია. მაშინ რატომ არ აკონტროლებენ იმას, რომ მშენებელი ასე არ მოგვექცეს?“- კითხვას სვამს ისევ ნანა ბერიძე.
მოქალაქეების თქმით, მათ პროკურატურას რამდენჯერმე მიმართეს, თუმცა უშედეგოდ.
აქციის კიდევ ერთი მონაწილე, რამაზ ზოიძე ამბობს, რომ მან დაახლოებით 3 წლის წინ მოიგო სასამართლო დავა სამოქალაქო წესით, თუმცა ვერც ბინა მიიღო და არც თანხა დაუბრუნეს.
„მე პირადად 14 ათასი დოლარი მქონდა გადახდილი. აღსრულებაზეა გადაცემული და ველოდებით… გაჭიანურდა ძალიან.
რამდენიმეს დაუბრუნეს თანხა, რადგან აუქციონზე გავიდა რამდენიმე ბინა და გაიყიდა. აღსრულებაშიც ამას გვეუბნებიან, რომ თუ აუქციონზე ბინა არ გაიყიდა, ისე თანხას ვერ დავიბრუნებთო,”- უთხრა რამაზ ზოიძემ „ბათუმელებს“.
ბათუმის მერიიდან აქციის მონაწილეებს ჯერ არავინ შეხვედრია.
„ბათუმელები“ ცდილობს სამშენებლო კომპანია „დიასთან“ დაკავშირებას.
ეს არ არის პირველი შემთხვევა, როცა სხვადასხვა სამშენებლო კომპანიისგან შეუსრულებელი დაპირებების გამო ადამიანები საპროტესტო აქციებს მართავენ. წლების განმავლობაში ითხოვენ დახმარებას კომპანია „სვეტისგან“ დაზარალებულებიც. ამ შემთხვევაში მოქალაქეებმა თქვეს, რომ ბათუმის მერისგან დაპირებები მიიღეს, თუმცა პრობლემა ჯერ არ მოგვარებულა.
ამ თემაზე:
„ჰაერში ვიხდიდით ფულს და ბინა არ აშენდა“ – დაზარალებულების აქცია ბათუმის მერიასთან
