„ამ გადაწყვეტილებას აუცილებლად გავასაჩივრებთ” – უთხრა „ბათუმელებს“ ლანა კიკავამ, გარემოს დაცვის ზედამხედველობის დეპარტამენტის იურისტმა. უწყება ბათუმის საქალაქო სასამართლოს გადაწყვეტილებას გაასაჩივრებს, რომლის მიხედვითაც ჯუმბერ სურმანიძეს, სიგარეტის ავტომანქანიდან გადმოგდებისთვის, მხოლოდ შენიშვნა მისცეს.
„არ ვმალავ, მწეველი ვარ, მაგრამ ნაგავი მე არ გადმომიგდია მანქანიდან, მხოლოდ სიგარეტის ნამწვავი გადმოვაგდე. გთხოვთ, მხოლოდ სიტყვიერი გაფრთხილება მომცეთ და ნუ დამაჯარიმებთ” – მიმართა მოსამართლე ხათუნა ბოლქვაძეს ჯუმბერ სურმანიძემ. მისი თქმით, ის ელექტრიკოსად თბილისში მუშაობს და ბათუმში სასამართლო პროცესისთვის ჩამოსვლაც ხარჯი იყო.
სამართალდარღვევის ოქმის მიხედვით, ჯუმბერ სურმანიძემ მიმდინარე წლის 8 მაისს ბათუმში, აეროპორტის გზატკეცილზე მოძრაობის დროს, ავტომანქანის სალონიდან ქუჩაში გადმოაგდო სიგარეტის ნამწვავი. მან გარემოს ზედამხედველობის წარმომადგენლების მიერ შედგენილ ოქმს ხელი მოაწერა.
„თუკი პირი ეჭვს გამოხატავს დაფიქსირებულ ფაქტთან დაკავშირებით, ჩვენ შეგვიძლია მას წარვუდგინოთ ვიდეო მასალა, რომელსაც ინსპექტირების მანქანაზე დამონტაჟებული ვიდეო თვალი აფიქსირებს” – ამბობს ლანა კიკავა. მან მოსამართლეს სამართალდამრღვევისთვის ჯარიმის – 120 ლარის დაკისრება მოსთხოვა.
„დავუშვათ გამონაკლისი” – ამ ფრაზით დაასრულა საქმის განხილვა მოსამართლე ხათუნა ბოლქვაძემ. მან ჯუმბერ სურმანიძე სამართალდამრღვევად სცნო და მხოლოდ შენიშვნის მიცემით შემოიფარგლა.
