26 მაისს, საქართველოს დამოუკიდებლობის დღესთან დაკავშირებით, ბათუმში „საოცრებათა პარკში“, ქართველი მომღერლების მონაწილეობით გალა კონცერტი გაიმართება. კონცერტზე დასწრება უფასოა. ბათუმის მერიის ინფორმაციით, კონცერტში მონაწილეობას მიიღებენ ქორეოგრაფიული ანსამბლებიც. კონცერტისთვის თვითმმართველობის ბიუჯეტიდან 28 ათასი ლარია გამოყოფილი.
კონცერტზე ქართველი მომღერლები აჩიკო ნიჟარაძე, ანრი ჯოხაძე, ნინი ბადურაშვილი, სოფო ხალვაში, ლიზა ბაგრატიონი და სხვა მომღერლები იქნებიან მოწვეული. ასევე, მსახიობი მურმან ჯინორია. კონცერტი, როგორც მერიაში აცხადებენ, ფეიერვერკით დასრულდება.
კონცერტამდე, დაგეგმილია იუნკერების მემორიალის შემკობა ყვავილებით, სასულე ორკესტრის მიერ შესრულდება საქართველოს ჰიმნი.
