საერთაშორისო პრესის ინსტიტუტის (IPI) მონაცემებით, 2022 წელს მსოფლიოში მედიის 66 წარმომადგენელი დაიღუპა სამსახურებრივი მოვალეობის შესრულებისას.
2022 წელს ყველაზე მეტი, 14 ჟურნალისტი დაიღუპა მექსიკაში, 8 ჟურნალისტი – რუსეთ-უკრაინის ომის გაშუქებისას, 8 კი ჰაიტიზე.
66 დაღუპულს შორის რვა ქალია.
IPI-მ ყველაზე შოკისმომგვრელი უწოდა „ალ-ჯაზირას“ პალესტინელი ჟურნალისტის, 51 წლის შირინ აბუ აკილას მკვლელობას – ჟურნალისტს ცეცხლსასროლი იარაღიდან თავში ესროლეს.
IPI-ის მონაცემთა ბაზა ჟურნალისტების მკვლელობებს ხუთ კატეგორიად ჰყოფს. ორგანიზაციის ცნობით, 2022 წელს მოხდა 39 მიზანმიმართული მკვლელობა, რაც იმას ნიშნავს, რომ ჟურნალისტები მოკლეს მათი სამუშაოს გამო; შვიდი ჟურნალისტი დაიღუპა შეიარაღებული კონფლიქტის გაშუქებისას; ორი – სამოქალაქო არეულობის გაშუქებისას, ხოლო ორი ჟურნალისტი დაიღუპა უშუალოდ დავალების შესრულებისას.
IPI-ის ცნობით, დანარჩენ 16 შემთხვევაში ჟურნალისტის მკვლელობის გარემოებები და მოტივი დაუდასტურებელი რჩება, მაგრამ სამუშაოსთან დაკავშირებული მკვლელობა არ არის გამორიცხული.
