გრიგოლეთი-ქობულეთის შემოვლითი გზის 5 კმ-იანი მონაკვეთი 2022 წლის ბოლომდე გაიხსნება – ამის შესახებ დღეს, 2 დეკემბერს, ირაკლი ქარსელაძემ, რეგიონალური განვითარებისა და ინფრასტრუქტურის მინისტრმა განაცხადა.
გრიგოლეთი-ქობულეთის მშენებარე გზა, სამინისტროს ინფორმაციით, მთლიანობაში 14.4 კილომეტრია, თუმცა კონკრეტულად რომელი მონაკვეთი გაიხსნება, სამინისტროს არ დაუკონკრეტებია.
როგორც „ბათუმელებმა“ გაარკვია, 5-კილომეტრიანი მონაკვეთი, რომელიც ახალ წლამდე გაიხსნება, ურეკის მიმდებარედ, კაპროვანთან [შეკვეთილში გადასასვლელ ხიდთან] დაიწყება, გაივლის საკონცერტო დარბაზ „ბლექ სი არენას“ უკან და შეკვეთილში, ქობულეთის შემოვლით გზას დაუკავშირდება.
საქართველოს საავტომობილო გზების დეპარტამენტის მიერ „ბათუმელებისთვის“ 2022 წლის აგვისტოში მოწოდებული ინფორმაციით, გრიგოლეთი-ქობულეთის შემოვლითი გზის სამშენებლო სამუშაოები ეტაპობრივად 2022 – 2023 წლებში დასრულდება. სახელშეკრულებო ღირებულება შეადგენს 228 721 622 ლარს. დაფინანსება ხორციელდება ევროპის საინვესტიციო ბანკის მიერ (EIB).
გრიგოლეთი–ქობულეთის შემოვლითი 4-ზოლიანი გზა აღმოსავლეთ-დასავლეთის ჩქაროსნული ავტომაგისტრალის (E60-ის) შემადგენელი მონაკვეთია.
ეს გზა, როცა მთლიანად აშენდება, ერთმანეთთან ქობულეთის შემოვლით და სამტრედია-გრიგოლეთის ჩქაროსნულ მაგისტრალებს დააკავშირებს.
რაც შეეხება სამტრედია-გრიგოლეთის მაგისტრალს, ის 4 მონაკვეთად შენდება და ჯერ მხოლოდ ერთი მონაკვეთია გახსნილი.
ამ თემაზე ნახეთ ვრცლად:
„დასრულდება ავტობანის მშენებლობა“ – „ოცნების“ შეუსრულებელი საარჩევნო დაპირება
