რომელი ბარათებით შეიძლება ბათუმის ავტობუსებში გადახდა და როდის აჭრის 80 თეთრს

ბათუმის მუნიციპალურ ავტობუსებში გადახდის ახალ აპარატებს ამონტაჟებენ, თუმცა გადახდის წესი ჯერ არ შეცვლილა. არ იცვლება მგზავრობის ფასიც და ერთი მგზავრობა 30 თეთრია.

ახალი აპარატებით მგზავრობის საფასურის გადახდა ისევ იმ პლასტიკური ბარათებითაა შესაძლებელი, რომლებითაც ამ დრომდე ვიხდიდით. ამ ბარათების [მათ შორის საქართველოს ბანკის ბარათების] გარდა, სხვა ქართული ბანკების პლასტიკური ბარათებით გადახდა ჯერჯერობით არ არის შესაძლებელი.

არის ერთი გამონაკლისი:

ახალი აპარატებით შესაძლებელია უცხოური ბანკების ბარათებითაც გადახდა, თუმცა, მგზავრს ბარათზე 30-ის ნაცვლად 80 თეთრი ჩამოეჭრება.

„როცა უცხოური ბანკის ბარათებით იხდიან, ეჭრებათ 80 თეთრი ბარათიდან, თუმცა მგზავრობის საფასური ამ შემთხვევაშიც 30 თეთრია. დამატებით 50 თეთრი კი მიაქვს იმ ბანკს, რომლის ბარათიცაა – ეს არის ბანკის მიერ ჩამოჭრილი მომსახურების თანხა. ეს 50 თეთრი „ავტოტრანსპორტს“ არ რჩება. თუ მაგალითად, ტურისტს არ სურს 80 თეთრის გადახდა, შეუძლია შეიძინოს ჩვენი ბარათები და იმით იმგზავროს 30 თეთრად“, – განმარტავენ „ბათუმის ავტოტრანსპორტში“.

2023 წლის იანვრიდან ახალი აპარატებით მგზავრებს საშუალება ექნებათ, მგზავრობის საფასური საქართველოს ბანკის ბარათების გარდა უკონტაქტო ტიპის, სხვადასხვა ბანკის პლასტიკური ბარათის მეშვეობითაც გადაიხადონ.

„ქართული ბანკების ბარათების შემთხვევაში მგზავრობის საფასური ახალი წლიდან ისევ 30 თეთრი დარჩება და ასეთ ბარათებზე მგზავრებს დამატებით თანხა არ ჩამოეჭრება – გვითხრეს „ავტოტრანსპორტში“.

ამავე თემაზე:

სიცხე და გადაჭედილი მუნიციპალური ტრანსპორტი ბათუმში – როდის იყიდის მერია ახალ ავტობუსებს