ნეტგაზეთი • RU

მაყურებელს უფასოდ შეუძლია დაესწროს „დინამო ბათუმისა“ და „ტორპედოს“ შეხვედრას

ხვალ, 3 დეკემბერს, ბათუმში მაყურებელს უფასოდ შეეძლება დაესწროს „დინამო ბათუმისა“ და „ქუთაისის ტორპედოს“ შეხვედრას. მატჩი ბათუმის სტადიონზე 13:30 საათზე დაიწყება.

ამის შესახებ „დინამო ბათუმის“ ფეისბუქის ოფიციალურ გვერდზე ვკითხულობთ.

კლუბი „დინამო ბათუმი“ საქართველოს ფეხბურთის ფედერაციის სადისციპლინო და დავების განმხილველმა კომიტეტმა დააჯარიმა და შეხვედრა „ტორპედოსთან“ მაყურებლის გარეშე უნდა გამართულიყო, თუმცა „დინამო ბათუმმა“ საფეხბურთო დავების განმხილველ ტრიბუნალში გაასაჩივრა დისციპლინარული სანქციები.

„ტრიბუნალმა იხელმძღვანელა კლუბის მიერ მოთხოვნილი უზრუნველყოფის შუამდგომლობით და გამოტანილი დადგენილებით განაჩენის განხილვამდე შეაჩერა აღნიშნული სანქციის აღსრულება. შედეგად, ხვალინდელ მატჩზე ქუთაისის ტორპედოსთან დაშვებულია მაყურებლის დასწრება. აქვე გაცნობებთ, რომ აღნიშნულ მატჩზე დასწრება უფასოდ შეგეძლებათ“, – წერს კლუბი „დინამო ბათუმის“ ადმინისტრაცია.

კლუბი „დინამო ბათუმი“ 15 ნოემბერს დაჯარიმდა 2022 წლის 12 ნოემბერს ეროვნული ლიგის ეგიდით ბათუმის „დინამოსა“ და წყალტუბოს „სამგურალს“ შორის გამართული მატჩის მიმდინარეობისას და მატჩის დასრულების შემდეგ მომხდარი ინციდენტის გამო.

  • რა მოხდა? 

2022 წლის 12 ნოემბერს „სამგურალმა“ „დინამო“ ანგარიშით 2:1 დაამარცხა. მატჩის დასრულების შემდეგ „დინამო ბათუმის“ პრეზიდენტი არჩილ ბერიძე მოედანზე შევარდა და მსაჯზე გაიწია, რასაც ვიდეომასალაც ადასტურებს.

ფეხბურთის ფედერაციის სადისციპლინო და დავების განმხილველი კომიტეტის გადაწყვეტილებით,  „დინამო ბათუმს“ დაეკისრა ფულადი ჯარიმა ორი ათასი ლარის ოდენობით.

„დინამო ბათუმის“ პრეზიდენტს, არჩილ ბერიძეს, დაეკისრა ფულადი ჯარიმა ექვსი ათასი ლარის ოდენობით და ერთი წლის განმავლობაში აეკრძალა სტადიონზე შესვლა  „დინამო ბათუმის“ როგორც საშინაო, ისე საგარეო მატჩებზე.

„დინამო ბათუმის“ სამეთვალყურეო საბჭოს წევრს, გურამ ბერიძეს, დაეკისრა ფულადი ჯარიმა ორი ათასი ლარის ოდენობით და 6 მატჩზე აეკრძალა სტადიონზე შესვლა „დინამო ბათუმის“ როგორც საშინაო, ისე საგარეო მატჩებზე.

„დინამო ბათუმის“ მთავარი მწვრთნელის თანაშემწეს, დავით ჯანელიძეს – სამმატჩიანი დისკვალიფიკაცია და ფულადი ჯარიმა ათასი ლარის ოდენობით.

„დინამო ბათუმის“  გულშემატკივართა მეკავშირე ოფიცერს დაეკისრა ფულადი ჯარიმა ორასი ლარის ოდენობით.

ამავე თემაზე: 

„დინამო ბათუმი“ დააჯარიმეს – კლუბის პრეზიდენტს მატჩებზე დასწრება 1 წლით აუკრძალეს

 

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.