3358 კვ.მეტრი ნაკვეთი მრავალწლიანი ნარგავებით, დაბა ჩაქვის მეორე სკოლის მიმდებარედ, ქობულეთის მერიამ საპრივატიზებო ობიექტების ნუსხაში შეიტანა. ეს ნუსხა თან ერთვის საკრებულოს სხდომაზე დასამტკიცებელ საკითხებს. მერია საკრებულოსგან ნუსხაში ცვლილების დამტკიცებას ითხოვს. აგრარული კომისიის სხდომაზე გასული საკითხების მიხედვით, რამდენიმე მცირე ზომის ფართობის პირდაპირი წესით გადაცემასაც ითხოვენ, მერს ამისთვის საკრებულოს თანხმობა სჭირდება.
გასაყიდ მიწის ნაკვეთს ერთ მხარეს სკოლა, მეორე მხარეს კი კერძო საკუთრებაში არსებული 500 კვ. მეტრი მიწის ნაკვეთი ესაზღვრება, რასაც შპს „სამკო“ ფლობს. კომპანია საუდის არაბეთის სამეფოს მოქალაქეს, ალმოხანა სამი აბდულაჰს ეკუთვნის.
გასაყიდი ნაკვეთი ჩაქვის მეორე სკოლასთან
გასაყიდი ობიექტების ნუსხაშია ყოფილი პანსიონატის – „ქარიშხალასა“ და აღმაშენებლის გამზირის #700-ს შორის არსებული 6051 კვ.მეტრი ზღვასთან. ამ ნაკვეთის მომიჯნავედ 1 ჰექტარზე მეტი [15 611კვ.მ] კი შპს „დრიმლენდ ოაზისს“ ეკუთვნის.
კომპანიას ქობულეთის მერიაში ადგილის განაშენიანების კონცეფციაც აქვს წარდგენილი. ერთიანი განვითარების პრინციპის თანახმად, კონცეფცია 3 ჰექტრის განვითარების ხედვას მოიცავს. დოკუმენტი განსახილველად ქობულეთის მერიას გარემოს ეროვნულ სააგენტოშიც გადაუგზავნია.
2022 წლის 12 ივლისს ქობულეთის მერისთვის, ლევან ზოიძისთვის მიწერილ წერილში სააგენტოს ხელმძღვანელი თამარ ფიცხელაური რამდენიმე საკითხის დაზუსტებასთან ერთად ითხოვს, კარგად გამოიკვეთოს რა გავლენას მოახდენს სამშენებლო პროექტი ქობულეთის დაცულ ტერიტორიებზე:
„…საპროექტო ტერიტორიიდან 400 მ მანძილზე მდებარეობს ქობულეთის დაცული ტერიტორიები, რომელიც, თავის მხრივ, ემთხვევა ზურმუხტის ქსელის დამტკიცებულ საიტს და რამსარის საიტს, თუმცა ანგარიშში არ ჩანს პროექტის ზემოქმედებით გამოწვეული შესაძლო ზემოქმედება აღნიშნულ ტერიტორიებზე, მათ შორის, ფრინველებზე.
ამასთან, დაგეგმილი მრავალსართულიანი შენობების მშენებლობისა და ექსპლუატაციის ნაწილი განხილულ უნდა იქნას ფრინველთა სამიგრაციო ზოლისა და მასზე შესაძლო ზემოქმედების ჭრილში. გარდა აღნიშნულისა, განხილული უნდა იქნას პროექტის განხორციელებით [სამშენებლო სამუშაოები] დაცულ ტერიტორიებზე ჰიდროლოგიური რეჟიმის შესაძლო ცვლილების შედეგად საერთაშორისო მნიშვნელობის ჭარბტენიან ტერიტორიებზე მოსალოდნელი ზემოქმედება. ზემოაღნიშნული ზემოქმედების [სახეების მიხედვით] ანალიზის შედეგად, საჭიროების შემთხვევაში შემოთავაზებულ იქნას ზემოქმედების თავიდან აცილების და/ან საკომპენსაციო ღონისძიებები.
მუქი ფერით მონიშნულია გასაყიდი მიწის ნაკვეთი, ხოლო ღია ფერით „დრიმლენდ ოაზისის“ მიწის ნაკვეთი
რენდერი / განაშენიანების კონცეფცია
ფოტომონტაჟი სანაპიროს მხრიდან
სააგენტოს ხელმძღვანელი დაზუსტებას ითხოვს ასევე ხეებთან დაკავშირებით, რომლებიც პროექტის განხორციელების შემთხვევაში უნდა მოიჭრას. გარდა ამისა, სააგენტომ მოითხოვა კონცეფციის განახლება შენიშვნების შესაბამისად.
საპრივატიზებო ობიექტების ნუსხაშია 3567 კვ.მეტრი მიწის ნაკვეთი მემედ აბაშიძის ქუჩის მიმდებარედ. ეს ნაკვეთი შპს „აჭარა მოტორს ჯორჯიას“ საკუთრებას ესაზღვრება, ამ ფართობზე განთავსებულია შენობებიც.
მონიშნულია გასაყიდი ნაკვეთი აბაშიძის ქუჩაზე
გასაყიდად ამზადებენ ასევე 2332 კვ.მეტრს რუსთაველის #172-ში. ნაკვეთს ესაზღვრება შპს „Georgian Industrial Asset Management Group“ – ის მიწის ნაკვეთი. კომპანიას აქ ხილის წვენების საწარმო აქვს. შპს Georgian Industrial Asset Management Group – ის 100 პროცენტი კვიპროსში დაფუძნებულ კომპანიას ეკუთვნის.
მერია გასაყიდად გაიტანს ასევე ქობულეთის აღმაშენებლის ქუჩაზე #522-სა და 576-ს შორის მდებარე ორ ნაკვეთს ზღვასთან.
ორივე ნაკვეთი ჯამში 16 968 კვ.მეტრია
აღმაშენებლის გამზირზე მერია ყიდის #385-ში მდებარე ნაკვეთს – 3249 კვ.მეტრს.
გასაყიდად გაიტანენ ასევე 8925 კვ. მეტრს აღმაშენებლის გამზირზე, „ჩოლოქის“ სამხრეთით მდებარე ტერიტორიას.
საპრივატიზებო ობიექტების ნუსხაშია 3500 კვ. მეტრი შპს „ვიქტორიას“ მიმდებარედ, ეს ნაკვეთიც ზღვასთან ახლოსაა, 1455 კვ.მ რუსთაველის #172-ში. გარდა ამისა, ყიდიან 1855 კვ.მეტრ მიწის ნაკვეთს აღმაშენებლის #744-ში.
ქობულეთის საკრებულოს სხდომა ხვალ, 25 ნოემბერს, უნდა გაიმართოს. ამავე სხდომაზე საკრებულო მომავალი წლის ბიუჯეტის განხილვას გეგმავს.
