დიდი ბრიტანეთის დაზვერვის ინფორმაციით, ბოლო ორ კვირაში რუსეთმა თავისი საჰაერო-სადესანტო ძალების ძირითადი ელემენტები დონეცკისა და ლუგანსკის ფრონტზე გადაიყვანა.
„საჰაერო-სადესანტო ძალების დანაყოფების ყველაზე დასუსტებული ნაწილები სექტემბრიდან ოქტომბრამდე, ხერსონში, მდინარე დნეპრის დასავლეთ სანაპიროს დაცვაზე იყვნენ მიმაგრებულნი. ახლა მათი გარკვეული დანაყოფები, სავარაუდოდ, მობილიზებული რეზერვისტებით გააძლიერეს,“ – წერს უწყება 24 ნოემბრის რელიზში.
დაზვერვის შეფასებით, ცუდად გაწვრთნილი პერსონალი არათუ გააძლიერებს, არამედ უფრო დააქვეითებს ერთ დროს ელიტურად მიჩნეული საჰაერო-სადესანტო ძალების შესაძლებლობებს.
„სავარაუდოდ, რუსეთი ამ დანაყოფებს კვლავაც იმ სექტორებს მიამაგრებს, რომლებსაც ყველაზე მნიშვნელოვნად მიიჩნევს. საჰაერო-სადესანტო ძალების ოპერატიული დავალება შეიძლება იყოს სვატოვო-კრემენაიას რაიონის დაცვის გამაგრება ლუგანსკში ან დონეცკის ქალაქ ბახმუტის გარშემო მიმდინარე შეტევის მხარდაჭერა,“ – აღნიშნავს უწყება.
გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში დაზვერვა წერდა, რომ რუსეთმა თითქმის ამოწურა ცალმხრივი თავდასხმის უპილოტო საფრენი აპარატების მარაგი, რადგან 17 ნოემბრის შემდეგ ამგვარი დრონების შეტევის შესახებ საჯაროდ აღარ გამოცხადებულა.
