ნეტგაზეთი • RU

რუსეთს დრონების მარაგიც ეწურება – ბრიტანეთის დაზვერვა

დიდი ბრიტანეთის დაზვერვის შეფასებით, რუსეთმა თითქმის ამოწურა ცალმხრივი თავდასხმის უპილოტო საფრენი აპარატების მარაგი. უწყების ცნობით, 17 ნოემბრის შემდეგ ამგვარი დრონების შეტევის შესახებ საჯაროდ აღარ გამოცხადებულა.

„სექტემბრიდან დღემდე რუსეთმა უკრაინაში, სავარაუდოდ, ირანული წარმოების ასობით ლეტალური უპილოტო საფრენი აპარატი გაუშვა. ეს აპარატები ცალმხრივი თავდასხმის დრონებისა და უფრო ტრადიციული მრავალჯერადი შეიარაღების სისტემების ნაზავს წარმოადგენს.

ეს იარაღი რუსეთმა ფართოდ გამოიყენა ტაქტიკურ სამხედრო სამიზნეებსა და უკრაინის ენერგოინფრასტრუქტურაზე თავდასხმისთვის,“ – წერს დაზვერვა 23 ნოემბრის რელიზში.

უწყების ვარაუდით, ბოლო პერიოდში რუსეთის სარდლობას ირანული წარმოების დრონების სამედიცინო დაწესებულებებზე დარტყმებისთვის გამოყენებაც სურდა.

„დიდი ალბათობით, რუსეთმა დრონების კამპანია ჩაიფიქრა, რათა ფრთოსანი რაკეტების მწვავე დეფიციტი ამ გზით შეევსო, თუმცა ამ მიდგომას შეზღუდული წარმატება ჰქონდა. გაშვებული დრონების უმრავლესობა უკრაინამ გააუვნებლა,“ – აღნიშნავს ბრიტანეთის დაზვერვა.

უწყების დასკვნით, რუსეთმა სავარაუდოდ თითქმის ამოწურა დრონების არსებული მარაგი და მისი შევსების გზებს ეძებს: „მოსკოვი, სავარაუდოდ, უფრო იოლად შეძლებს უპილოტო საფრენი აპარატების შემოტანას, ვიდრე ფრთოსანი რაკეტების თავისით წარმოებას“.

გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელი რელიზის ყურადღების ცენტრში რუსეთის შავი ზღვის ფლოტი და ნოვოროსიისკის პორტის ნავთობტერმინალზე თავდასხმა იყო.

დაზვერვა წერდა, რომ 18 ნოემბერს მომხდარი ინციდენტის დეტალები არ ხმაურდება, თუმცა ნებისმიერი სახით იმის დემონსტრირება, რომ უკრაინას ნოვოროსიისკის პორტისთვის საფრთხის შექმნა შეუძლია, რუსეთისთვის კიდევ ერთ სტრატეგიულ გამოწვევად იქცევა და შავ ზღვაში მის ისედაც შემცირებულ გავლენას კიდევ უფრო დაასუსტებს.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.