ნეტგაზეთი • RU

რა იქნება შემდეგ, თუ „ნაციონალური მოძრაობა“ დაიშლება? – 2 აზრი

რა მოხდება იმ შემთხვევაში, თუკი „ნაციონალურ მოძრაობაში“ არსებული დაპირისპირება ამ პარტიას დაშლამდე მიიყვანს? – ეს კითხვა პოლიტიკის ანალიტიკოსებს დავუსვით. „ნაციონალურ მოძრაობაში“ შიდაპარტიული არჩევნებისთვის ემზადებიან, აქ რამდენიმე ლიდერი ერთმანეთს დაუპირისპირდა.

დავით ზურაბიშვილი, „რესპუბლიკური პარტიის“ ყოფილი წევრი მიიჩნევს, რომ „რაც უფრო დასუსტდება „ნაციონალური მოძრაობა“, მით უფრო დასუსტდება „ქართული ოცნებაც“, თუმცა ეს არსებითად ვერ შეცვლის ოპოზიციის ფლანგს.

პოლიტოლოგ ბაკურ კვაშილავას აზრით, თუ ენმ მართლაც დაიშლება, დაახლოებით ერთ წელში „ოცნება“ შეძლებს ძალაუფლება უფრო კომფორტულად განიმტკიცოს. შემდეგ კი, ოპოზიციას გააჩნია, რამდენად გამოიყენებს მთავარი ოპოზიციური პარტიის დასუსტებას, ან დაშლის შედეგად მიღებულ შანსებს.

„მოკლევადიან პერსპექტივაში ეს მეტ თავისუფლებას გააჩენს „ქართული ოცნებისთვის“. ვგულისხმობ იმას, რომ უფრო ნაკლებად არგუმენტირებული კრიტიკა იქნება „ოცნების“ მიმართ, ის უფრო თავისუფლად მოახერხებს თავისი პოლიტიკის გატარებას და ხელისუფლების განმტკიცებას… საშუალოვადიან პერსპექტივაში კი, ეს შესაძლებლობაა სხვა ოპოზიციური პარტიებისთვის, რაც შესაძლოა, ვერ გამოიყენონ“, – ამბობს პოლიტოლოგი ბაკურ კვაშილავა.

პოლიტოლოგის დაკვირვებით, აქამდე სხვა ოპოზიციურ პოლიტიკურ პარტიებს ხელს უშლიდა ამომრჩევლის ხმის მიცემის ფსიქოლოგია.

„ამ დრომდე ამომრჩევლის ნებას განსაზღვრავდა არამხოლოდ ის, თუ ვინ მოსწონს და მის შეხედულებებთან ვინ არის ახლოს, არამედ ის, თუ ვის შესწევს რეალური ძალა, მოახდინოს ცვლილებები. ბოლო 10 წელი მეორე ადგილზეა „ნაციონალური მოძრაობა“. შესაბამისად, ოპოზიციურ პარტიებისთვის ეს იქნება შანსი, მაგრამ ეს არის მხოლოდ შესაძლებლობა,“ – ამბობს ბაკურ კვაშილავა და წინა საპარლამენტო არჩევნებიდან ოპოზიციის ერთ-ერთ მთავარ გზავნილს იხსენებს იმის საილუსტრაციოდ, რომ შესაძლოა ოპოზიციამ „შანსი“ ვერ გამოიყენოს.

„ქართული პოლიტიკის თავისებურება ისაა, რომ პარტიები ცდილობენ არა ნელ-ნელა და თანმიმდევრული პოლიტიკით გაზარდონ მხარდამჭერთა რაოდენობა, არამედ ერთი „გასროლით“ მოიპოვონ უმრავლესობა…

ოპოზიცია საუბრობდა წინა არჩევნებზე იმაზე, რომ საქართველოში არასდროს ყოფილა 9 წელი ერთი და იგივე ხელისუფლება და ლოგიკაა შეცვლა, ასე ვეღარ გაგრძელდებაო. არადა, რატომ ვერ გაგრძელდება, კარმაა? ვხედავთ, რომ ასე მოხდა. ეს 9-წლიანი ციკლი წარმოაჩინეს, როგორც გარდაუვალობა და არაფერი არ იქნა რეალურად გაკეთებული იმისთვის, რომ რეალური ცვლილებები მომხდარიყო.

ამიტომაც ვამბობ, ეს ქმნის შესაძლებლობას და მეტს არაფერს. ეს არ არის გარდაუვალი რამ,“ – აღნიშნა „ბათუმელებთან“ პოლიტოლოგმა, ბაკურ კვაშილავამ.

ამ თემაზე საუბრის დროს პოლიტოლოგი ყურადღებას ამახვილებს IRI-ის ბოლო კვლევაზეც, რომლის მიხედვითაც გამოკითხულთა 35 % წინააღმდეგია ენმ რაიმე ფორმით დაბრუნდეს ხელისუფლებაში.

„ეს მაჩვენებელი ბევრად აღემატება „ოცნების“ მხარდამჭერების რაოდენობას,“ – შენიშნავს პოლიტოლოგი. – „ეს აჩვენებს იმას, რომ ადამიანების გარკვეულ რაოდენობას ურჩევნია ყველაფერი, გარდა „ნაციონალური მოძრაობისა“.

შესაბამისად, თუ ოპოზიციას ექნება სწორი სტრატეგია, შესაძლოა, მან მეტი ნდობა მოიპოვოს. თუ ეს შესაძლებლობაც ხელიდან იქნება გაშვებული, მაშინ „ოცნება“ კიდევ უფრო გაძლიერდება,“ – გვითხრა ბაკურ კვაშილავამ.

პოლიტოლოგის აზრით, ენმ-ს კრიტიკა „ოცნების“ მიმართ ვერ გახდა დამაჯერებელი. ოპოზიციურ პარტიებს კი, მეტი შესაძლებლობა ექნებათ, დამაჯერებელი და თანმიმდევრული სვლებით რეალურად შეცვალონ ბალანსი ქართულ პოლიტიკაში.

„ენმ-ს კრიტიკა ვერ გახდა დამაჯერებელი, ისეთი, როგორც ხალხს სურდა. ამას აჩვენებს ის, რომ უკმაყოფილების ზრდის მიუხედავად, ენმ-ს მხარდაჭერა არ იზრდებოდა. კრიტიკის ფორმა და ტაქტიკა უნდა შეიცვალოს,“ – დასძინა პოლიტოლოგმა ბაკურ კვაშილავამ.

ოპოზიციურ ფლანგზე ცვლილებებს ნაკლებად ელის „რესპუბლიკური პარტიის“ ყოფილი წევრი, დავით ზურაბიშვილი იმ შემთხვევაში, თუ ენმ დაიშლება. მისი აზრით, ენმ-ს დასუსტება შესაძლოა „ოცნებაზე“ უფრო აისახოს.

„არ ვგულისხმობ ანტიდასავლურ ძალებს და ღიად პრორუსებს, რომლებსაც არაფერი ეშველებათ, მაგრამ „ოცნების“ ამომრჩეველში ბევრია ისეთი, ვინც „ოცნებას“ ირჩევს იმიტომ, რომ „ნაციონალების“ დაბრუნება არ სურს და „ოცნებას“ განიხილავს, როგორც ყველაზე ნაკლებ პრობლემას. ახლა შესაძლოა ამ ამომრჩეველმა სხვაგან გაიხედოს, თუ დაინახავს, რომ ნაცმოძრაობის დაბრუნება აღარაა შესაძლებელი.

შემპასუხებელი „ოცნებას“  მაინც ეყოლება, თანაც ამ დრომდე „ოცნების“ პროპაგანდა იდგა იმაზე, რომ ყველა „ნაცია“: „ნაცია“ ხაზარაძე და გახარიაც, ელისაშვილიც „ნაცია“, თუ საქმეს დასჭირდა. ეს გზავნილი უკვე ეფექტს დაკარგავს,“ – მიიჩნევს დავით ზურაბიშვილი.

პოლიტიკის ანალიტიკოსის აზრით, ენმ-ს დაშლის შემთხვევაში, ენმ-ს ამომრჩეველი მაინც ოპოზიციის ამომრჩევლად დარჩება, ან ყველაზე ცუდ შემთხვევაში, ისიც შინ დარჩენას ამჯობინებს, როცა მორიგი არჩევნების დრო მოვა.

„ამ პარტიის მხარდამჭერები არიან მიხეილ სააკაშვილის ამომრჩევლები, სხვადასხვა ხალხია იქ, მაგრამ აერთიანებთ სააკაშვილის და მისი მმართველობის პერიოდისადმი დამოკიდებულება. ენმ-ში არიან კონსერვატორები, ლიბერალები, ყველანაირი ხალხია, მათი მთავარი გზავნილია, რომ წინა ხელისუფლება ამჟამინდელს სჯობდა.

ოპოზიციის ამ ფლანგზე, რომელსაც ნაცურ „ფლანგსაც“ ეძახიან, ფიქრობენ, რომ „ნაციონალური მოძრაობის“ ხელისუფლება იყო უკეთესი, მაგრამ საზოგადოების ძალიან დიდი ნაწილი არ ფიქრობს ასე, ეს ნაწილი არც ხელისუფლების მხარდამჭერია. ამ ნაწილში არ არის ძლიერი ორიენტირი. ეს ამომრჩეველი, რომელსაც არც „ნაცი“ უნდა და არც „ქოცი“, დარჩენილია უპატრონოდ, პოლიტიკური ორიენტაციის გარეშე. ეს ნაწილი სახლში რჩება, ან რომელიმე 2-3 %-იან პარტიას უჭერს მხარს.

ამ დრომდე ყველა ცდილობდა „ნაციონალური მოძრაობის“ რესურსებით ესარგებლა, ან მისი დღის წესრიგით მოქმედ მასმედიაში ყოფილიყო პოპულარული. ეს უფრო აინტერესებდათ, ვიდრე ამომრჩეველი და ხალხთან მუშაობა. ოპოზიციურ პარტიებს არც კი ჰქონდათ ამის სურვილი.

არ ვიცი, რატომ არის ასე, მაგრამ უფრო სუბიექტური მიზეზია: ჩვენთან სურთ, რომ ხვალვე დაიდოს შედეგი, შორს არ იხედებიან. გახარიას პარტია აქტიურობდა შედარებით, ანა დოლიძე, რესპუბლიკელები, ელისაშვილი, მაგრამ ძალიან პასიურები არიან. როგორც ჩანს, ვერ ხვდებიან საკუთარ მნიშვნელობას,“ – გვითხრა დავით ზურაბიშვილმა.

ნეტგაზეთის მასალების სხვა გამოცემებში გადაბეჭდვის წესი
ავტორი