ნეტგაზეთი • RU

რა ელის ხულოში, დიდაჭარაში მდებარე ჭადრაკის სახლს – მერიის პასუხი

რა ელის ხულოს სოფელ დიდაჭარაში 1985 წელს აგებულ ჭადრაკის ხის სახლს, რომელიც დაზიანებულია? – ხულოს მერიის მუნიციპალიტეტის პრესსამსახურში გვითხრეს, რომ მათთვის ცნობილია დიდაჭარის ჭადრაკის სახლის ამორტიზებული მდგომარეობის შესახებ.

„ჩვენს გვყავს დიდაჭარაში წარმომადგენელი, შესაბამისი სამსახურიც ინფორმირებულია და ვიცით, როგორც წარმომადგენლისგან, ასევე მოსახლეობისგან ჭადრაკის სახლის მდგომარეობა. ჩვენც არაერთხელ ვნახეთ ეს შენობა.

ხულოს მუნიციპალიტეტის 2023 წლის ბიუჯეტში არ არის გათვალისწინებული დიდაჭარის ჭადრაკის სახლის სარეაბილიტაციო სამუშაოები, თუმცა 2023 წლის განმავლობაში, თუ ბიუჯეტში გაჩნდება შესაბამისი თანხა, ტენდერებიდან მიღებული ეკონომიებით და ა.შ., რა თქმა უნდა, აღნიშნული საკითხიც განიხილება.

შენობის რეაბილიტაცია ალბათ ადგილზე მოხდება, გადატანის გარეშე“, – ამბობენ ხულოს მერიის პრესსამსახურში.

მუნიციპალიტეტის მერიის პრესსამსახურის ინფორმაციით, ზამთარში ჭადრაკის სწავლების პროცესს, რომელიც ჯერ ისევ დიდაჭარის ჭადრაკის სახლში გრძელდება, შენობის ავარიული მდგომარეობის გამო შეფერხების საშიშროება არ ელის:

„დიდაჭარაში საკმაოდ კარგი ადმინისტრაციული შენობა გვაქვს, სადაც სხვადასხვა სივრცეა. ერთი ოთახი დაეთმობა ჭადრაკს და ჩვეულებრივად შეუძლიათ გააგრძელოთ მეცადინეობა“, – გვითხრეს ხულოს პრესსამსახურში.

_______________________

ამავე თემაზე:

რა ისტორია აქვს და რა ელის დიდაჭარის ჭადრაკის სახლს ხულოში

დიდაჭარაში ისტორიის მასწავლებელი, რომელიც ფუნდამენტალისტებს თივაში დაუმალეს

ნეტგაზეთის მასალების სხვა გამოცემებში გადაბეჭდვის წესი
ავტორი