უკრაინის სამხედრო დაზვერვის წარმომადგენელი, ვადიმ სკიბიცკი, იმ 6 ქვეყანას ასახელებს, რომლებიც რუსეთს ომის წარმოებაში სხვადასხვა გზით ეხმარებიან ან შესაძლებელია, დაეხმარონ.
უკრაინული მედიის ცნობით, სკიბიცკიმ ამის შესახებ იტალიურ გამოცემა La Repubblica-სთან ინტერვიუში ილაპარაკა.
მისი თქმით, ცნობილია, რომ მოსკოვმა დახმარებისთვის ირანის გარდა ჩინეთსა და ჩრდილოეთ კორეასაც მიმართა, ყაზახეთი და უზბეკეთი კი რუსეთს სანქციების გვერდის ავლაში ეხმარებიან.
„მათ ასევე მიმართეს ჩინეთსა და ჩრდილოეთ კორეას, შესაძლოა, ყირგიზეთსაც, იარაღისთვის, კერძოდ, ზალპური ცეცხლის რეაქტიული სისტემების – „სმერჩისა“ და „ურაგანის“ ტყვიებისთვის. არის ქვეყნები, მაგალითად, ისეთები, როგორებიცაა: ყაზახეთი და უზბეკეთი, რომლებიც ეხმარებიან მოსკოვს, რომ სანქციებს გვერდი აუაროს, აწვდიან ამერიკულ და იაპონურ სამოქალაქო კომპონენტებს, რომლებიც რუსეთს რაკეტების შესაქმნელად სჭირდება,“ – ამბობს ვადიმ სკიბიცკი.
სხვა ქვეყნებისთვის მიმართვა, უკრაინის სამხედრო დაზვერვის წარმომადგენლის აზრით, რუსეთის სერიოზულ პრობლემებზე მიუთითებს. ასევე იმაზეც, რომ ის თანამედროვე შეიარაღება, რომლითაც რუსეთი აღლუმებზე იწონებს თავს, სინამდვილეში მხოლოდ ინსცენირებაა.
„კრემლი მკაცრი სანქციების ქვეშაა და ეს სანქციები ძირს უთხრის არამხოლოდ რუსეთის ეკონომიკას. ისინი ხელს უშლის რუსეთის შესაძლებლობას, თავისუფლად, როგორც ამას ომამდე აკეთებდა, შეისყიდოს შეიარაღება და აუცილებელი კომპონენტები თავისი სამხედრო წარმოებისთვის,“ – აღნიშნავს სკიბიცკი.
ირანი რუსეთს დამატებით ბალისტიკურ რაკეტებსა და დრონებს უგზავნის – CNN
