უკრაინის პრეზიდენტი ვოლოდიმირ ზელენსკი არ მიიღებს მონაწილეობას G20-ის, „დიდი ოცეულის“ სამიტში, რომელიც ნოემბერში გაიმართება ინდონეზიაში, თუ იქ რუსეთის პრეზიდენტი ვლადიმერ პუტინი იქნება.
ამის შესახებ დღეს, 3 ნოემბერს, განაცხადა ზელენსკიმ კიევში გამართულ ბრიფინგზე.
„ჩემი პირადი და უკრაინის პოზიციაა, რომ თუ რუსეთის ფედერაციის ლიდერი მიიღებს მონაწილეობას სამიტში, მაშინ უკრაინა არ მიიღებს მონაწილეობას,“ – ციტირებს უკრაინული გამოცემა „უნიანი“ ზელენსკის განცხადებას.
გამოცემისვე ცნობით, ზელენსკიმ ამავე დროს დასძინა, რომ უკრაინა მოახლოებული სამიტისთვის ემზადება.
„დიდი ოცეულის“ სამიტი 15-16 ნოემბერს გაიმართება ბალიზე, ინდონეზიაში. ინდონეზიის პრეზიდენტმა ჯოკო ვიდოდომ სამიტზე მიიწვია რუსეთის პრეზიდენტი ვლადიმერ პუტინი, თუმცა პუტინის მონაწილეობა სამიტში ჯერ არ დადასტურებულა.
ამერიკული მედია წერს, რომ აშშ-ის პრეზიდენტს, ჯო ბაიდენს, „დიდი ოცეულის“ სამიტზე პუტინთან არათუ პირისპირ, არამედ დერეფანში შეხვედრა და საერთო ფოტოზე გამოჩენაც კი არ სურს.
რაც შეეხება კრემლის პოზიციას, რუსეთის საგარეო საქმეთა მინისტრმა, სერგეი ლავროვმა, ჯერ კიდევ ოქტომბერში განაცხადა, რომ მოსკოვი უარს არ იტყოდა G20-ის სამიტზე ვლადიმერ პუტინისა და ჯო ბაიდენის შეხვედრაზე.
