ევროპაში აშშ-ის სახმელეთო ჯარების ყოფილი მეთაური, გენერალი ბენ ჰოჯესი მიიჩნევს, რომ 2023 წლის ზაფხულისთვის უკრაინის არმია მთელი ქვეყნის დეოკუპაციას შეძლებს.
საკუთარი პროგნოზის შესახებ გენერალმა „ამერიკის ხმის“ ეთერში ისაუბრა.
„უკრაინა აღადგენს სუვერენიტეტს მთელ თავის ტერიტორიაზე, ცხადია, ყირიმის ჩათვლით. მე ველოდები, რომ ეს მომავალი წლის ზაფხულისთვის მოხდება. თუმცა მანამდე, ამ წლის ბოლომდე, უკრაინის შეიარაღებული ძალები რუსეთის ჯარებს დააბრუნებენ იმ საზღვრებთან, რომლებთანაც ისინი თებერვლამდე იყვნენ, შემდეგ კი დაიწყებენ აუცილებელი ნაბიჯების გადადგმას ყირიმის დასაბრუნებლად,“ – ამბობს ბენ ჰოჯესი.
ევროპაში აშშ-ის სახმელეთო ჯარების ყოფილი მეთაური ფიქრობს, რომ ზამთარში უკრაინის არმია რუსეთისაზე უკეთეს პირობებში აღმოჩნდება, რადგან ისინი საკუთარ ტერიტორიაზე არიან, მათთვის უფრო მეგობრულ გარემოში. გარდა ამისა, ფაქტორებია უკრაინელთა მაღალი მოტივაცია და დასავლელი პარტნიორების დახმარებაც:
„50 ქვეყანა ერთსულოვნად ცდილობს უკრაინის სამხედრო შესაძლებლობებით უზრუნველყოფას. ეს მოიცავს ზამთრის ტანსაცმელსა და აღჭურვილობასაც, მაშინ, როდესაც რუსეთის მომარაგების სისტემა უკვე ძალაგამოცლილია. ახლა ისინი ფრონტზე მოუმზადებელ, გაუწვრთნელ და არადისციპლინირებულ ადამიანებს გზავნიან. ეს მათ მხოლოდ სირთულეებს დაუმატებს.“
ჰოჯესის აზრით, უკრაინის ტერიტორიების უფრო სწრაფი გათავისუფლებისთვის, საჭიროა, დასავლელმა პარტნიორებმა უკრაინას მეტი ტანკი მიაწოდონ, კერძოდ, შეერთებულმა შტატებმა „აბრამსები“, გერმანიამ კი „ლეოპარდები“.
უკრაინის შეიარაღებული ძალები განაგრძობენ კონტრშეტევას ფრონტის კონკრეტულ მონაკვეთებზე, უკრაინული მედიაც და ექსპერტებიც აღნიშნავენ, რომ კონტრშეტევის ტემპი ბოლო პერიოდში შენელებულია, თუმცა ოპერაცია გრძელდება.
რამდენიმე დღის წინ, „უკრაინსკა პრავდასთან“ ინტერვიუში უკრაინის სამხედრო დაზვერვის ხელმძღვანელი, კირილო ბუდანოვი ამბობდა, რომ მისი პროგნოზით, სამხედრო მოქმედებები უკრაინის ტერიტორიაზე 2023 წლის გაზაფხულ-ზაფხულში დასრულდება – ამ დროისთვის უკრაინის შეიარაღებული ძალები უკვე 1991 წლის საერთაშორისოდ აღიარებულ საზღვრებზე გავლენ.
