„სიამოვნებით ვივლიდი აშშ-ში ექსკურსიებზე, თუმცა ჩემთვის ბევრად მნიშვნელოვანია, რაც ამ სასწავლო ვიზიტებით შევიძინე, მათ შორის, გამოცდილების გაცვლით და პროცესებზე დასწრებით. ბოლო ვიზიტის დროს 8-დან საღამოს 7 საათამდე, ყოველ დღე, პროცესებს ვესწრებოდით და ამერიკელ კოლეგებს ვხვდებოდით,“ – მოსამართლე ეკა არეშიძე ფეისბუქსტატუსით გამოეხმაურა იუსტიციის უმაღლესი საბჭოს ახალ წევრს, მოსამართლე ლევან მურუსიძეს.
ლევან მურუსიძემ, რომელიც სასამართლო კლანის ლიდერად არის მიჩნეული და რამდენიმე დღის წინ ისევ იუსტიციის უმაღლესი საბჭოს წევრი გახდა, წუხელ „პირველი არხის“ ეთერში მოსამართლეების აშშ-ში ვიზიტზე თქვა ეს:
„…ხუთი დღით წავლენ მოსამართლეები და დაათვალიერებენ შენობებს, კარგია, რომ დაისვენებენ, ნახავენ, რა დიდებულია აშშ, მაგრამ ხომ შეიძლება, ეს უფრო ეფექტურად გამოვიყენოთ… მოსამართლეები არ ლაპარაკობენ, უბრალოდ, ზრდილობის თემაა, თორემ გულწრფელად გეუბნებით, ყველა იძახის, ჩავალთ, შენობას ვნახავთ და ჩამოვდივართო“.
მოსამართლეების აშშ-ში წასვლის თემა აქტუალური მას შემდეგ გახდა, როცა „ნიკა გვარამიას საქმის“ განმხილველი მოსამართლე ლაშა ჩხიკვაძე აშშ-ს საელჩომ პროგრამიდან მოხსნა. შტატებში ამავე პროგრამის მონაწილე არც დანარჩენი ხუთი ქართველი მოსამართლე გაემგზავრა.
ლევან მურუსიძეს რამდენიმე მოსამართლე გამოეხმაურა სოციალურ ქსელ „ფეისბუქში“.
„მადლობა ყველა იმ ქვეყანას და საერთაშორისო ორგანიზაციას, ვინც წლებია იღვწის და უამრავ რესურსს ხარჯავს ქართული სასამართლო სისტემის გაჯანსაღებისა და განვითარებისთვის. იმედს ვიტოვებ, რომ ეს თანამშრომლობა კვლავ გაგრძელდება და იმ ეტაპამდე მივალთ, რომ ექსკურსიებზე სიარულიც საკმარისი იქნება,“ – წერს ეკა არეშიძე. ის თბილისის საქალაქო სასამართლოს მოსამართლეა.
მოსამართლის ამ პოსტზე სხვა მოსამართლეებიც გამოეხმაურნენ. მაგალითად, მოსამართლე ლილი მსხილაძე ხაზს უსვამს იმას, რომ აშშ-ში დაინახა, რა როლი აქვს მოსამართლეს.
„გეთანხმები ეკა, ამერიკაში სასამართლო პროცესებზე დასწრებამ დამანახა და მასწავლა შეჯიბრებითობაზე დამყარებულ პროცესებზე, თუ რა დიდი როლი აქვს მოსამართლეს. უამრავი მადლობა ამერიკელ კოლეგებს ჩვენი მხარდაჭერისთვის და გაძლიერებისთვის,“ – აღნიშნავს მოსამართლე ლილი მსხილაძე, ისიც თბილისის საქალაქო სასამართლოს მოსამართლეა.
რუსთავის საქალაქო სასამართლოს მოსამართლე მადონა მაისურაძე კი, ლევან მურუსიძეს ახსენებს, რომ იუსტიციის საბჭოს წევრებიც დადიან სამუშაო ვიზიტით სხვადასხვა ქვეყანაში და ამის ექსკურსიად მიჩნევა არასწორია.
„ჩვენი პარტნიორების დახმარებით უდიდესი გამოცდილება და ცოდნა შეიძინა თითოეულმა მოსამართლემ. სამუშაო ვიზიტებით საბჭოს წევრებიც არაერთ ქვეყანაში არიან ნამყოფი და ექსკურსიად აღქმა არასწორია. ამით ყველა იმ ადამიანის შრომის დაკნინება ხდება, ვინც ძალიან დიდ რესურს დებს საერთო საქმეში და რუსთავის საქალაქო სასამართლო ყოველთვის წარმატებით იყენებს იქ მიღებულ გამოცდილებას…“ – წერს მოსამართლე მადონა მაისურაძე.
მოსაზრება უზენაესი სასამართლოს მოსამართლე ეკატერინე გასიტაშვილმაც გამოხატა:
„კი გამიკვირდა, რა შუაშია შენობები-თქო….ძალიან საინტერესო სასამართლო სხდომებს დავესწარი და ქალთა როლის გაძლიერების თაობაზე არაერთი საინტერესო შეხვედრის მონაწილე ვარ, რომ არაფერი ვთქვა პროფესიული ეთიკის კუთხით ჩატარებულ დისკუსიებსა და გამოცემულ წიგნებზე. წარმატებები პატივცემულ კოლეგებს, რომლებიც თავდაუზოგავად შრომობენ!“ – წერს უზენაესი სასამართლოს მოსამართლე.
სასამართლო კლანის პირობებში ზემოთ ხსენებული და კიდევ რამდენიმე მოსამართლე გამოხატავს სხვადასხვა დროს განსხვავებულ პოზიციას. მაგალითად, გასულ წელს 14-მა მოსამართლემ გააპროტესტა ცვლილება კანონში „საერთო სასამართლოების შესახებ“, რომელიც მოსამართლეთა ინდივიდუალური პასუხისმგებლობის საკითხს ეხება.
