ნეტგაზეთი • RU

ლუკაშენკო ცდილობს, აიძულოს უკრაინა ჩრდილოეთ საზღვარი დაიცვას – ბრიტანეთის დაზვერვა

დიდი ბრიტანეთის დაზვერვის ყურადღების ცენტრში რუსულ-ბელარუსული არმიაა.

14 ოქტომბერს ბელარუსის პრეზიდენტმა ალექსანდრ ლუკაშენკომ განაცხადა, რომ ახალ რუსულ-ბელარუსულ დანაყოფში 70 ათასი ბელარუსი და 15 ათასი რუსი სამხედრო შევა.

15 ოქტომბერს ბელარუსის ხელისუფლებამ გამოაქვეყნა ვიდეო, რომელიც, მათი მტკიცებით, აჩვენებს, როგორ შედიან რუსული ძალები ბელარუსში, თუმცა დიდი ბრიტანეთის დაზვერვა ამ ვიდეოზე ასახული ფაქტის ნამდვილობას ეჭვქვეშ აყენებს.

„ნაკლებსავარაუდოა, რომ რუსეთმა ბელარუსში ნამდვილად გადაისროლა დამატებითი ძალების მნიშვნელოვანი რაოდენობა,“ – წერს დიდი ბრიტანეთის დაზვერვა 21 ოქტომბრის რელიზში. – „რუსეთი დიდი ალბათობით ვერ შეძლებს ბრძოლისუნარიანი გაერთიანებების შექმნას გამოცხადებული მოცულობით, რადგან მისი ძალები კონცენტრირებულია უკრაინაში, ბელარუსის არმიას კი რთული ოპერაციების ჩატარების მხოლოდ მინიმალური შესაძლებლობები აქვს“.

უწყების ვარაუდით, ერთობლივ დანაყოფებზე განცხადების მიზანი, სავარაუდოდ, არის რუსულ-ბელარუსული სოლიდარობის ჩვენება და მცდელობა, აიძულონ უკრაინა თავისი ძალები ჩრდილოეთ საზღვრის დასაცავად მიმართოს.

დიდი ბრიტანეთის თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. როგორც გუშინდელ რელიზში აღნიშნავდა დაზვერვა, როგორც ჩანს, რუსეთის ხელისუფლება მართლაც განიხილავს ხერსონიდან უკან დახევას. უწყება იქვე მიუთითებდა, რომ ამ პროცესში რუსეთის არმიის მთავარი გამოწვევა მდინარე დნეპრის გადალახვა იქნება.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.