მთავარი,სიახლეები

უკრაინის თავდაცვა მოუწოდებს მოქალაქეებს, არ გადაიღონ ჩამოგდებული დრონის ნამსხვრევები

17.10.2022 • 1665
უკრაინის თავდაცვა მოუწოდებს მოქალაქეებს, არ გადაიღონ ჩამოგდებული დრონის ნამსხვრევები

უკრაინის თავდაცვის მინისტრის მოადგილე, ანა მალიარი მოუწოდებს უკრაინელებს, არავითარ შემთხვევაში არ გადაიღონ და არ გამოაქვეყნონ ჩამოვარდნილი დრონების ნარჩენები.

მინისტრის მოადგილის თქმით, ყველა, ვინც ასეთ ფოტოებს აქვეყნებს, უნებლიეთ რუსეთს ეხმარება.

„თითქოს არაფერი საშიში არაა – ჩვენ ვამაყობთ ჩვენი ჰაერსაწინააღმდეგო თავდაცვის ეფექტიანობით, მაგრამ ნელ-ნელა უნდა ვისწავლოთ სამხედროებივით აზროვნება და ცოტა წინაც გავიხედოთ,“ – წერს მალიარი და დასძენს, რომ თუკი კადრში მოხვდება უპილოტო საფრენი აპარატის საბორტო ნომერი, ამით რუსებს შეუძლიათ დაადგინონ, მიაღწია თუ არა დრონმა დანიშნულების ადგილამდე.

მისი თქმით, დრონების ფოტოები რუსულმა საინფორმაციო საშუალებებმა შესაძლოა პროპაგანდისტული მიზნებითაც გამოიყენონ, მაშინაც კი, თუ ფოტოზე არ ჩანს გარემო და ადგილი, სადაც ისაა გადაღებული.

სარაკეტო და საავიაციო შეტევა კიევსა და უკრაინის კიდევ ოცამდე ქალაქზე რუსეთმა 10 ოქტომბერს დაიწყო. მას შემდეგ რამდენჯერმე დაიბომბა უკრაინის მნიშვნელოვანი ინფრასტრუქტურა და სამოქალაქო ობიექტები.

უკრაინის ხელისუფლების ცნობით, მორიგი თავდასხმა დღეს დილით განხორციელდა, რუსეთმა ირანული წარმოების უპილოტო საფრენი აპარატებით დაბომბა კიევი და რამდენიმე ქალაქი. კიევის დაბომბვას, წინასწარი ინფორმაციით, ოთხი ადამიანი ემსხვერპლა.

დღესვე ირანის საგარეო საქმეთა სამინისტრომ განაცხადა, რომ თეირანს მოსკოვისთვის სამხედრო დრონები არ მიუწოდებია და ინფორმაცია ამის შესახებ პოლიტიკური მოტივებით ვრცელდება.  

გადაბეჭდვის წესი


ასევე: