ნეტგაზეთი • RU

მოსკოვში სამხედროების დაპატიმრება დაიწყო – უკრაინის დაზვრევა

რუსეთის დედაქალაქ მოსკოვში ეროვნული გვარდიის ელიტური ნაწილები შევიდნენ – ამის შესახებ ინფორმაციას უკრაინული მედია ავრცელებს უკრაინის დაზვერვაზე დაყრდნობით. უკრაინის დაზვერვის ინფორმაციით, რუსეთის ფედერაციის დედაქალაქი დღეს მშვიდად ვერ არის – ქალაქიდან არაერთი სამხედროს დაკავებაზე ვრცელდება ცნობები.

„რუსეთის დედაქალაქში სამხედროების წინააღმდეგ კომპლექსური „ზომების“ მიღება დაიწყო. ცენტრში გადაადგილება შეზღუდულია. ქალაქში შევიდა ძერჟინსკის სახელობის ოპერატიული დანიშნულების დივიზია – რუსული გვარდიის „ელიტური დანაყოფი“, – ნათქვამია უკრაინის თავდაცვის სამინისტროს დაზვერვის მთავარი სამმართველოს მოხსენებაში.

დაზვერვის ინფორმაციით, საბრძოლო მზადყოფნაშია ასევე საჯარისო ფორმირებები, რომლებიც მოსკოვის გარშემოა განლაგებული.

„ცნობილია მრავალრიცხოვანი სამხედროების დაპატიმრებაზე, დაკავებასა და ბლოკირებაზე. მოსკოვის პერიმეტრზე ყველა სამხედრო ნაწილი საბრძოლო მზადყოფნაშია“, – მითითებულია უკრაინის დაზვერვის მიერ გავრცელებულ ინფორმაციაში.

უკრაინის თავდაცვის სამინისტროს ინფორმაციაში არაფერია ნათქვამი ამ დაკავებების მიზეზებზე.

____

უკრაინის ძალების ბოლოდროინდელი წარმატებები იმედს აძლევს დიდი ბრიტანეთისა და დასავლეთის ქვეყნების ხელისუფლებებს, რომ სრულმასშტაბიანი ომი შესაძლოა უკვე წლის ბოლომდე დასრულდეს – ამის შესახებ ბრიტანული The Times-ი კონფიდენციალურ წყაროებზე და სამხედრო ექსპერტებზე დაყრდნობით დღეს წერს.

სამხედრო საქმის ექსპერტები ვარაუდობენ, რომ „ვაგნერელთა“ მეთაური ევგენი პრიგოჟინი და ჩეჩნეთის რესპუბლიკის მეთაური რამზან კადიროვი თავდაცვის მინისტრის სერგეი შოიგუს გადაყენებას ცდილობენ.

საერთაშორისო კვლევითი ორგანიზაცია ომის შემსწავლელი ინსტიტუტის [ISW] პროგნოზით, საბოლოოდ პუტინი შეეცდება უკრაინის წინააღმდეგ ომში წარუმატებლობა სამხედრო სარდლობას დააბრალოს. კერძოდ, რუსეთის თავდაცვის მინისტრი სერგეი შოიგუ განტევების ვაცი გახდება.

დღეს ყირიმში ააფეთქეს ქერჩის [ყირიმის] ხიდი, რომელიც რუსეთმა 2014 წლის, ნახევარკუნძულის ოკუპაციის შემდეგ ააგო. ამ ხიდს, როგორც რუსეთისთვის, ისე უკრაინისთვის აქვს როგორც სიმბოლური, ისე სტრატეგიული დანიშნულება.

უკრაინული მედიის ინფორმაციით, ყირიმის ხიდი აფეთქების უკან, უკრაინის უშიშროება დგას.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.