უკრაინის პრეზიდენტმა, ვოლოდიმირ ზელენსკიმ განაცხადა, რომ ყირიმის ხიდი უკრაინის ლეგიტიმური სამიზნეა, რადგან ოკუპანტებს ამ ხიდით იარაღი გადააქვთ. მისი თქმით, ეს სამიზნე უნდა „განეიტრალდეს“.
„მიზანი მთელი ყირიმის დაბრუნებაა, რადგან ეს არის ჩვენი სუვერენული ტერიტორია… ქერჩის ხიდი არ არის პატარა ლოჯისტიკური გზა, იგი გამოიყენება საბრძოლო მასალის მიწოდებისა და ყირიმის ნახევარკუნძულის მილიტარიზაციისთვის.
ჩვენთვის ნათელია, რომ ეს მტრის ობიექტია, რომელიც აშენდა საერთაშორისო სამართლის მიღმა, ამიტომაც, ცხადია, რომ ეს არის ჩვენი სამიზნე და ნებისმიერი სამიზნე, რომელსაც მოაქვს ომი და არა მშვიდობა, უნდა განეიტრალდეს“.
ზელენსკიმ ასევე ხაზგასმით აღნიშნა, რომ უკრაინის კონტრშეტევა უფრო ნელა მიმდინარეობს, ვიდრე მოსალოდნელი იყო, რადგან ოპერაცია თავდაპირველად დაგეგმილზე გვიან დაიწყო, ამან კი რუსეთს დანაღმვისა და თავდაცვის რამდენიმე ხაზის შექმნის დრო მისცა.
ყირიმის, იგივე ქერჩის საავტომობილო და სარკინიგზო ხიდი, რომელიც რუსეთს ოკუპირებულ ყირიმთან აკავშირებს, 2016-2018 წლებში ააშენა რუსეთმა და ის 3,5 მილიარდი დოლარი დაჯდა. მისი სიგრძე დაახლოებით 18 კილომეტრია.
