ნეტგაზეთი • RU

რატომ შეუერთდა დეპუტატი ზაალ მიქელაძე „ოცნებიდან“ წასულ „ოთხეულს“

4 ოქტომბერს აჭარის ჯანდაცვის ყოფილი მინისტრი და პარლამენტის წევრი „ოცნებიდან“, ზაალ მიქელაძე მოძრაობა „ხალხის ძალას“ შეუერთდა.

ეს მოძრაობა „ქართული ოცნებიდან“ წასულმა დეპუტატებმა: სოზარ სუბარმა, დიმიტრი ხუნდაძემ, მიხეილ ყაველაშვილმა და გურამ მაჭარაშვილმა დააარსეს წელს, აგვისტოში და აქამდე ძირითადად იმით გახდნენ ცნობილი, რომ საქართველოში აშშ-ის ელჩის, კელი დეგნანის მისამართით ავრცელებენ კრიტიკულ განცხადებებს.

რატომ გადაწყვიტა ზაალ მიქელაძემ მოძრაობაში გაერთიანება? – ამ თემაზე „ბათუმელები“ პარლამენტის წევრს ესაუბრა.

  • ბატონო ზაალ, რატომ გადახვედით „ქართული ოცნებიდან“ მოძრაობა „ხალხის ძალაში“, რას ვერ ამბობდით მმართველ პარტიაში?

მე არასდროს არ ვეკუთვნოდი იმ კატეგორიას, ვინც გაურბოდა ჟურნალისტებს. ვიყავი რა პარლამენტში, ვხედავდი, რომ კულისებში იყო გარკვეული საუბრები დახურულ შეხვედრებში, რომელიც მთავრდებოდა იმით, რომ ეს არ უნდა გატანილიყო საზოგადოებაში, რაც გარკვეულ უხერხულობას ქმნიდა და ძალიან ახლო გარემოცვაშიც კი თავს ვიკავებდით დეტალების გამჟღავნებისგან.

  • რა არ უნდა გატანილიყო გარეთ, თქვენ კონკრეტულად რა მოისმინეთ?

აი, ის ნაწილი, რაც უკვე განცხადებებში იქნა გამოტანილი.

  • იქნებ დააკონკრეტოთ. 

მე ყოველთვის ვთვლიდი, რომ ბევრი საკითხი არის ხალხთან ერთად გასავლელი, მხოლოდ პოლიტიკოსების გადასაწყვეტი არ უნდა იყოს ამ ქვეყნის მომავალი და ხალხი მხოლოდ არჩევნების დროს არ უნდა იყოს ინფორმირებული რაღაც საკითხებზე, არამედ მთელ ამ შუა პერიოდშიც, მით უმეტეს იმ საფრთხეებიდან გამომდინარე, რაც დღეს ჩვენ გვაქვს რეგიონში.

  • თქვენ საუბრობთ საფრთხეებზე, ასევე ამბობთ, რომ გესმოდათ რაღაც კულუარებში, რაც არ უნდა გასულიყო გარეთ. დაგვიკონკრეტეთ, რა საფრთხეებზე საუბრობთ კონკრეტულად, რომ გავიგოთ, თქვენი მიზანი რა არის?

კიდევ ერთხელ ვამბობ, რომ ამ საფრთხეების შესახებ, ამ განცხადებებით, რაც უკვე გავრცელდა ახალი მოძრაობის სახელით, იყო ნათქვამი.

  • მოძრაობა ამბობდა, რომ დასავლეთი ომში გვითრევს, ამას გულისხმობთ? [მოძრაობის ლიდერებმა 29 ივნისს გაავრცელეს განცხადება, რომ  საზოგადოებას „მეტი ინფორმაცია“ უნდა მიაწოდონ საქართველოს ომში ჩართვის საფრთხეზე, დაგეგმილ რევოლუციაზე და ამბობდნენ, რომ ამის უკან „დიდი ძალები“ არიან].

ასეთი განცხადება მე არ მომისმენია. არ ვაპირებ ამ სიღრმეებში შესვლას ჟურნალისტებთან. პირველ რიგში, ჩვენ კონსტიტუციას ვცემთ პატივს, სადაც დაიწერა გარკვევით საქართველოს ევროპული და ევროატლანტიკური არჩევანი.

მე ორი თვე ვაკვირდები და ყველა განცხადებას ვკითხულობ, არ მინახავს ამ მოძრაობის ანტიამერიკული [განცხადება].

„მოძრაობამ“ კითხვები დაუსვა დიპლომატს, ეს რატომ აღიქმება ანტიამერიკულ განწყობად, უბრალოდ ვერ ვხვდები.

  • თქვენ პირადად, აშშ-ის ელჩთან რაიმე კითხვები გქონდათ და ვერ დაუსვით?

ჰოდა, დასვეს უკვე ეს კითხვები, მაგრამ ვერ მიიღო ქვეყანამ პასუხები. სხვა თემაა, ვის მოსწონს ეს კითხვა, ვის – არა. მე სხვა რამეს ვამბობ, რომ კითხვის დასმაც კი იქნა აღქმული ანტიამერიკულ განწყობად. უბრალოდ, ამას ვერ ვხვდები. ხვალ რომ კითხვა დავუსვათ საფრანგეთის ან გერმანიის ელჩს, რა, ეს იქნება ანტიფრანგული განწყობა?!

  • პირადად თქვენ რა კითხვები გქონდათ აშშ-ის ელჩ კელი დეგნანთან?

რა კითხვებიც მქონდა, ერთად გაიგებთ ყველანი. იმიტომ ვართ ჩვენ გუნდი, ეს ძალა, რომ კითხვასაც ერთად ჩამოვაყალიბებთ.

  • თქვენი მოძრაობა აცხადებდა, რომ გარკვეულ ძალებს საქართველოს უკრაინის ომში ჩართვა სურს [მოძრაობის ლიდერი, სოზარ სუბარი ამბობდა, რომ შესაძლოა, აშშ-ის ელჩი, კელი დეგნანი, ბიძინა ივანიშვილზე ამ თემაზე ირიბი ფორმით ახდენდა ზეწოლას]. თქვენი აზრითაც ასეა, აშშ ითრევს საქართველოს უკრაინის ომში?

მსგავსი განცხადება თქვენ სად მოისმინეთ, არ ვიცი. ეს გამოდის ინტერპრეტაცია, რომ ამერიკა ითხოვს. არა. აქ იყო საუბარი, სავარაუდოდ, ისევ ელჩთან მიმართებაში, რომ მას ჰქონდა მსგავსი მინიშნებები საუბრის დროს.

თორემ, ამერიკამ მოითხოვა ომში ჩაბმა, ასე არ ყოფილა. თუმცა უკრაინის მაღალჩინოსნებისგან პირდაპირი ტექსტით მოვისმინეთ. შიგნით, დარბაზში, კიდევ ჩვენი ოპონენტი კოლეგებისგან და ეს ხალხმა უნდა იცოდეს. ვიღაცებს აწყობთ ეს ყველაფერი ალბათ თავიანთი პოლიტიკური მომავლისთვის.

  • ელჩს გულისხმობთ „ვიღაცებში“?

კი ბატონო. თუ ვინმე ფიქრობს, რომ აფხაზეთი და ოსეთი  ამ გზით არის დასაბრუნებელი, რომ ახლა შანსია და მოდით, გადაიარეთ ამ ყველაფერზე – რით დამთავრდება ეს გადავლა, რასაც ესენი მოგვიწოდებენ აქ…

  • ჩვენ არ მოგვისმენია მსგავსი რამ აშშ-ის ელჩისგან და თქვენც იცით, რომ მან ამ საკითხზე არაერთხელ გააკეთა ღიად განცხადება.

მე დარბაზში მყოფებისგან ვიძახი და როდესაც ასეთ განცხადებებს არ ემიჯნებიან ვიღაცები, დიპლომატიური წრეები, რა თქმა უნდა, კითხვის ნიშნები ჩნდება.

სულ სამი სიტყვითაა სათქმელი, რომ „ვემიჯნები“. მე თუ რაღაცას ვემიჯნები, გაბედულად ვიტყვი. თავის დროზეც იმიტომ შემოვდგი პოლიტიკაში ფეხი, რომ დავინახე რევანშს აპირებდნენ ამ ქვეყანაში ის ძალები, რომელთა ქმედებებმაც ჩემ თვალწინ გაიარა.

  • „ოთხეული“, იგივე „ხალხის ძალა“ არაერთხელ შეფასდა, როგორც პრორუსული მოძრაობა. რას ფიქრობთ ამაზე?

ვინ შეაფასა? იმათ, ვინც ყველაფერი პრორუსული გააკეთა? მაშინ ვინმე გვეკითხებოდა და ისე გადაულოცეს ყველაფერი მათ (რუსებს)… დავანებოთ ომს და ომის თემას თავი, ყველა დანარჩენი ეკონომიკური პროდუქტები პირდაპირ ჩააბარეს, ალბათ წილებშიც უზიან დღემდე, იმდენად კარგად და ბედნიერად ცხოვრობენ იმ პარტიის ლიდერები.

ოთხი წელი მინისტრი ვიყავი [აჭარის ჯანდაცვის მინისტრი] და ვერაფერი საკუთარი ვერ მოვახერხე, კეთილდღეობის შექმნა და უფრო მაგარი პოსტები ეჭირათ, როცა თანამდებობიდან წასულები უცებ მილიარდერების სიაში აღმოჩნდნენ?!

  • მთავრობაში ყოფნის დროს რომ გამდიდრდნენ, „ქართულ ოცნებაში“ ასეთები არ გინახავთ?

მე პირადად არ მინახავს.  ვიღაც-ვიღაცები რომ მიდიან და სურათებს იღებენ… ჩემს სოფელში რომ წავიდნენ და მეზობლებს გადაუღონ ფოტოები და შემდეგ თქვან, რომ ეს ყველაფერი ზაალ მიქელაძისააო.

ვიღაც დაიჯერებს, რომ ეს ასეა, ვინც მე არ მიცნობს.

  • თქვენ ხედავთ რა ხდება ლარსზე, რუსეთის ათასობით მოქალაქე შემოდის ქვეყანაში. ამაში თუ ხედავთ საფრთხეს ქვეყნისთვის და თუ აპირებთ რაიმე განცხადების გაკეთებას?

თუ ეს შექმნის საფრთხეს, არსებობს შესაბამისი ორგანოები, რომლებიც ამ ყველაფერს აკონტროლებენ და ისინი მიგვანიშნებენ, რომ ამის უკან არის რაღაც საფრთხე, ამაზე იქნება რეაგირება.

  • თქვენ როგორ ფიქრობთ, პირადად?

თუ ადამიანი გამორბის, თუნდაც იმ ქვეყნიდან, იმის გამო, რომ არ უნდა იარაღის აღება და უკრაინელისთვის სროლა, ამაზე კარგი რა არის, რომ ასეთ ადამიანს ბევრმა გაუღოს კარები და მე ვნახე ბევრი ქვეყნის განცხადება ამასთან მიმართებაში. ამაში ცუდს ვერაფერს ვერ ვხედავ.

ვინც იტყვის, რომ  პუტინს არ ემორჩილება ამ ძმათამკვლელ ომში, იმას რატომ არ უნდა შევუწყოთ ხელი.

  • რუსეთთან თუ გაქვთ კითხვები, ხომ არ აპირებთ ამ კითხვების დასმას?

რუსეთთან ყოველთვის იყო კითხვები.

მე ის კითხვა მაქვს, რომ 1989 წლის 9 აპრილის შემდეგ, მიუხედავად ბევრი მეგობრისა, ახლობლისა, კავშირები მქონდა ყველგან და ყველასთან, რადგან საბჭოთა კავშირში ვცხოვრობდი, მე რუსეთის ტერიტორიაზე ფეხი არ დამიდგამს. ამ კითხვებს რომ მისვამენ [ისინი], რომლებიც მას შემდეგ იქ სწავლობდნენ კიდეც, დადიოდნენ, ბიზნესში იყვნენ ჩართული და ფულს დღესაც კი იღებენ იქედან, იმათგან ვერ მივიღებ კითხვებს.

  • რუსეთი არის თქვენთვის ოკუპანტი?

როდის არ იყო. 9 აპრილი ტყუილად კი არ ვახსენე, როდესაც მთავრობის სახლის წინ ვიყავი, ჩემი მეხსიერებიდან არ ამოვა ეს.

იყო, არის და იქნება. პუტინის და პუტინამდელი რუსეთი ასეთი იყო და ახლა მით უმეტეს, ყველაზე აგრესიული სახით იქცევა.

არა მხოლოდ უკრაინაში და ჩვენ მიმართაც.

  • თქვენ ფიქრობთ, რომ ჩვენი ადგილი არის ევროპაში, ნატოში და არა რუსეთთან?

ეჭვის დონეზე რაღაც გრჩებათ ესე იგი, რადგან ამ კითხვას მისვამთ.

კიდევ ერთხელ ვამბობ, რომ ამ ქვეყნის მომავალი არის ევროატლანტიკური სივრცე, რაც არა მხოლოდ ევროპას ნიშნავს, პლუს ნატოს ნიშნავს და აქედან გამომდინარე, ჩვენ ამ მიმართულებით კითხვებს არ ვსვამთ.

კითხვებს ვსვამთ კონკრეტული ადამიანების კონკრეტულ გადაწყვეტილებებთან მიმართებაში. ჩვენი მომავალი რომ ევროპული არჩევანია, ამაზე კითხვა არც უნდა დაისვას, მე მგონი, ამ ქვეყანაში.

  • გამოდის, რომ თქვენი მოძრაობის ერთადერთი პრობლემა კელი დეგნანია და მხოლოდ იმიტომ შეიქმნა ეს მოძრაობა, რომ თქვენს კითხვებს არ პასუხობდა ელჩი?

არა მხოლოდ, ყველა ის გადაწყვეტილება და ის გამოგზავნილი მესიჯები, რომლებიც ამ ქვეყნის უსაფრთხოებას საფრთხეს შეუქმნის.

  • ხომ ამბობთ, რომ აშშ ჩვენი პარტნიორი უნდა იყოს, ევროპა ჩვენ გვერდით უნდა იყოს, ვინ უქმნის მაშინ საფრთხეს ჩვენს უსაფრთხოებას?

უნდა ვიყოთ უფრო მეტად ფხიზლად, რომ არც ერთი ასეთი მესიჯი უპასუხოდ არ დავტოვოთ.

  • თქვენს მოძრაობას არასდროს გაუპროტესტებია თუნდაც ის ფაქტი, რომ საქართველოს ოკუპირებული ტერიტორიებიდან ადამიანები მიჰყავთ ომში, უკანონო რეფერენდუმები უკრაინაში… ამაზე კითხვები არ გაქვთ?

რა განცხადება უნდა გაკეთდეს ამაზე, როგორ გავაპროტესტოთ, როცა ისინი [სოხუმში] საერთოდ არ მოდიან კონტაქტზე და ის ადამიანები შენთან კავშირზე არ არიან და ვიღაც გეუბნება, რომ „შედი და აიღე“ [აფხაზეთი].

  • რა მნიშვნელობა აქვს კავშირზე არიან თუ არა, ქვეყნის ტერიტორიიდან ხომ მიჰყავთ ადამიანები ომში, ეს არ იწვევს თქვენში პროტესტს?

თვითონ თვლიან, რომ რუსეთის მოქალაქეები არიან და იმის მოწოდებას მიჰყვებიან.

  • დამისახელეთ ერთი განცხადება, რომელიც რუსეთის პოლიტიკის, ოკუპაციის წინააღმდეგ გააკეთა თქვენმა მოძრაობამ.

ჩვენი არსებობით ვაპროტესტებთ იმ პოლიტიკას, რომელიც ჩვენს სახელმწიფოს რაიმე ზიანს მოუტანს… გავივლი მაგ საკითხს ჯგუფთან, მექნება კონსულტაცია.

  • ამერიკაში ყოფილხართ როდისმე?

არა და მინდა ძალიან. ბევრ ქვეყანაში არ ვარ ნამყოფი, გარდა რამდენიმე სავალდებულო ვიზიტისა, როცა მინისტრობის დროს ვიყავი რამდენიმე ქვეყანაში.

როცა თქვენ მეუბნებით, რომ ჩვენი გუნდისგან რაღაცები არ გაჟღერებულა, სწორედ იმიტომ, რომ იმ რაღაცების გაჟღერებას სჭირდება სივრცე და დარწმუნებული ვარ, ამ სივრცეს სწორად გამოიყენებს მოძრაობა. იმედია, ამას არ შეეხება ანტიოლიგარქიული კანონი.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com